Şîlan Sulume Nisêbîn de yena dinya, verê hepisxaneyan û rayîrê koçberîye de pîle bena. Şerê Kobanî û zordarîya dewlete aye ser o tesîr kenê û a ver bi koyanê Kurdîstanî şina. 9ê kanûna 2016î de Gare de şehîd bena.
Nisêbîn cografyaya Kurdîstanî de sey cayê xoverdayîş û serewedartişî yeno naskerdene. Bi seyan ciwanê Nisêbînî seba azadîya şarê xo ganê xo dayo. Şîlane Sulum (Amara Çiya) zî înan ra yew a.
Pîyê Şîlane, Bedrettîn Sulum, Nisêbîn de mîyanê xebatan de ca girewt û ame tepiştene. Wexto ke o kewt hepisxane, dayîka aye Atîye diganî bîye; Şîlane wexto ke pîyê aye hepis de bî, ameye dinya. Pîyê aye reya verêne hepisxane de kênaya xo dîye. Seba rewşa ekonomîke û tedaya dewlete, keyeyê Sulumî serra 2001î de bar kerd Îzmît Kocaelî.
Bedrettîn Sulum Hepisxaneyê Amedî de rastê îşkenceyî ame û dekewt rojeyê mergî. Badê 3 serran ame verdayene, la weşîya ey xirab bîbî û seba tedawî pereyê înan çin bî. Keye reya diyine bar kerd qezaya Beyogluyî ya Îstanbulî. Uca pîyê aye reyna ame tepiştene û ame şawitene Hepisxaneyê Kandira. Şîlane şîye pêvînayîşê pîyê xo; seba ke bi kurdkî qisey kerd, telefon ame birnayene. Şîlane hêrs bîye, êdî nêşîye pêvînayîşan û pîyê xo rê mektûb nuşt.
Şerê Kobanî, qirkerdişê DAÎŞî û tedaya şarê kurdan ser o tesîrêko gird kerd Şîlane ser o. Aye mekteb ra fek verda û beşdarê çalakî û xebatan bîye. Serra 2015î de xebatê Îstanbulî aye rê bes nêbî û a şîye koyanê Kurdîstanî. Şîlane 9ê kanûna 2016î de Gare de şehîd bîye.
Bedrettîn Sulumî vat ke o şîyo Mexmûr û uca kênaya xo dîya. Kênaya ey ey ra vatbî “Bi roniştişî nêbeno”. Sulumî wina vat: “Ez bi kênaya xo serberz bîya. Kênaya mi bi waştişê azadî û azadbîyayîşê Kurdîstanî beşdar bîbî. Tena yew waştişê ma est o: Ma wazenê gorê kênaya xo bivînê û aye bîyarê welat.”
