Dîyar Koç protestoyanê vera hêrişanê Rojawanî de ameybî tepiştene û hetê nijadperestan ra ameybî hedefnawnayene. Celseya diyine ya dewaya ey de şahîd, leşkerê bi nameyê M.B.yî, vat ke Koçî beyraqe nêarda war.
Dîyar Koç 20ê çeleyî de, protestoyanê vera hêrişanê Rojawanî de, sînorê Nisêbîn û Qamişloyî ser o hetê leşkeran ra bi hovane ame îşkencekerdene û destbendkerdene. Koç bi îdîaya ke “beyraqa Tirkîya arda war” ame hedefnawnayene û bi îdîayanê “endamîya rêxistine”, “propagandaya rêxistine” û “kewtişê herêma leşkerî” ame tepiştene.
Koç destbendîye de zî rastê îşkenceyêka girane ame û çend rojî nêweşxane de mend. Hema birînê ey weş nêbîbî ke ame şawitene Hepisxaneyê Sîncanî yê Ankara. Koç badê 6 aşman celseya verêne de ame verdayene.
Celseya diyine ya dewaye Dadgeha Cezayê Giranî ya 2. ya Mêrdînî de ame kerdene. Dîyar Koç û avûkatê ey Ridvan Kurt Colemêrg ra bi rayîrê SEGBÎSî beşdarê celse bî; şahîdo nimite zî salona dadgehe ya Mêrdînî de amade bî. Koçî pawitişê xo yo verên tekrar kerd.
Şahîdê dewa M.B.yî ke bi xo leşker o û îşkence kerdbî Dîyar Koçî, vat ke Koçî beyraqa Tirkîya direk ra nêarda war; beyraqe hetê Rojawanî ra ameye antene war.
Badê pawitişan, dadgehî qerar da ke şertê kontrolê edlî yê Koçî dewam bikero û celse taloq kerd 22ê kanûna verêne.
