Amed de Kongreya Psîkolojî ya 2. ya Mezopotamyaye, bi sloganê “Ganî merdim psîkolojîyê xo bi ziwan û nasnameyê xo hîs bikero” ya ke do hîrê rojî dewam bikero, dest pêkerd.
Kongreya Psîkolojî ya 2. ya Mezopotamyaye, ke hetê Komela Psîkologanê Mezopotamyaye ra (DER-MEZ) bi sloganê “Ganî merdim psîkolojîyê xo bi ziwan û nasnameyê xo hîs bikero” yena organîzekerdiş û do hîrê rojî dewam bikero, Merkezê Kongre ya Elî Emîrî ya Şaredarîya Amedî ya Şaristanê Girdî de dest pêkerd. Kongre de, ke zêdeyêrê 50 qiseykerdoxî çar perçeyanê Kurdîstanî ra, dîaspora û şaristananê cîya-cîyayan yê Tirkîya ameyê têhet, do panel û komxebatê cîya-cîya bêrê viraştiş. Salonê kongre de pankartê “Psîkoljîyê merdimî bi ziwanê ey asan a” ame daliqnayene. Xeylî psîkolog, sîyasetmedar, endam û temsîlkaranê sazgehanê sîvîl yê komelkî û xeylî kesî tewrê kongre bîyî.
Kongre bi deqîqeyêk rêzgirewtişî dest pêkerd. Dima ra, qiseykerdoxan akerdena kongreyî de dîyar kerd ke çinîhesinbnayîşê ziwanî psîkolojîya kesan ser o tesîr keno û qetî kerd ke psîkolojî tena meselêyêka ferdî nîyo û ganî merdim psîkolojîya merdimî bi ziwan û nasnameya ey fam bikero.
Kongre bi babetanê “Xebatê Awankerdişê Ziwan û Nasnameyî”, “Pratîkanê Psîkolojî de Ceribnayîş û Terapî”, “Awankerdişê û Înkarkerdişê Nasnameyî de Cayê Ziwanê Dayike” dewam kerd.
Roniştişo yewin bi sernameyê “Xebatê Awankerdişê Ziwan û Nasnameyî” bi tewrbîyayîşê psîkologanê Kovara Psîkolojî Kurdî Abdulsîttar Ozmenî, Kovara Psyche Mezg Erkan Yildirimî, endama DER-MEZ’î Gulîstan Barik Keleşe, Todapî zî bi Asli Aydemîre dest pêkerd.
‘Çarçewaya nasname û tesdîqkerdişî de ziwan zaf muhîm o’
Kovara Psîkolojî Kurdî ra Abdulsîttar Ozmenî dîyar kerd ke tespîtkerdişê problem û çareserîyan ê bi ziwanê xo, seba înan cayê zerrîweşîye yo û nê çî va: “Ez wazena hina ziwanî ser o vinderî. Ez do zêdeyêr qala gotaranê ma yê warê psîkoljîyê kurdî bikera. Wexto ke ma qala nasnameyî bikerê, nasname çîyêko komelkî yo, hedîseyêko ke merdim xo pê nas keno û komel de zî nasnameyêk pêşkeşê merdimî keno. Heto bîn ra no yena manaya tesdîqkerdişê merdimî. Nasnameyêk merdimî est a ke merdimî ê bînan ra cîya keno. Nasname û tesdîqkerdişê ma zî est ê. Na çarçewa de ziwan zaf muhîm o.”
‘Xebatanê ma de şuxulnayîşê ziwanê ma seba ma zaf muhîm o’
Erkan Yildirimî dîyar kerd ke warê psîkolojî de lîteratûra înan çin bî û ê wextê xebatanê xo de raştê tayê zehmetîyan zî ameyê û wina dewam kerd: “Wexto ke kesêk amêni û bi kurmanckî yan zî bi dîyalektêk bînî çîyêk persêne, seba ke lîteratûrê psîkolojî çin bîyî, ma zehmetî antêni. Heta tayê kesê ke bi kurdkî nêzanayêne zî seba ke xo rê qisey bikerê û vebêjê amêne cem ma. Semedê nê ra, ma dest bi nustena gotaran kerd, ma ziwan û edebîyata xo ard cem yewbînan. Ma mîyanê xo de qiseykerd, nuşte nuşt û qada edebîyat, ziwan, derûnî û perwerdeya taybet de xebat rayra berd. Serra 2020î de ma kovarêk hedre kerd, namê kovara ma Pênas o. Tayê psîkolog, akademîsyen û pisporê xizmeta komelkî amê cem yewbînan. Ma Amed, Mêrdîn û Stenbol ra li ser înternetî qiseykerd û kovarêk bi eno reng hedre kerd û na kovar ji serra 2020î û tepîya ra dewam kena. Roja Ziwanê Dayike ya Dinya de hûmara aye ya yewine vet. Ma li ser derûnî û perwerdeya taybet vindert û hûmara ma ya peyêne de ma ca da gotaranê akademîsyen û psîkologan. Bi o hawa ma 4 hûmar vetî. Hûmara ma ya newiye de hevpeyvînê li ser perwerdeya taybet, otîzm, sendroma Down û gotarê li ser psîkolojîye ca girewt. Xebatanê ma de şuxulnayîşê ziwanê ma seba ma zaf girîng o.”
‘Hewcedarîya sazgeh û şarê ma komelêka psîkolojî estbî’
Gulistan Barik Keleşe zî dîyar kerd ke wexto ke înan des serrî verê nika dest pêkerdî, kêm kesî bîy la ewro ê resayê amancê xo û konferansêka bi na hawa virazenê û Gulistan Barik Keleşe eno çî ard ziwan: “Bi raştî hewcedarî bi sazgeh û şarê ma bi komelêka derûnasîye esta bîya û DER-MEZ zî li ser no çî ame awankerdene. Weqtê ke ma komela xo awan kerd, şarê ma û komela ma şerêko zehmet de bî û bi o meqsed ma qerar û înîsîyatîf girewt ser xo û ma dest bi xebatanê xo kerd. Ma her tim hewl da ke bi ziwanê xo xebatanê xo hina bikerê.”
Aslî Aydemîre zî gedeyî û tesîrê ziwanê dayike ya ke cuyayîşê merdiman ser o de vindert.
Roniştişo yewin bi persan û cewaban qedîya.
