Komîsyonê Domanan û Komîsyonê Polîtîkayanê Perwerdeyî yê DEM Partî xemgînîya xo ya xorîne îfade kerd ke lîseyêka Turgutluyî de hêrişêko çekdarî bîyo. Komîsyonan vat ke vernîya şîdetî ya mekteban bi awankerdişê kulturê haştîye yena girewtene.
Komîsyonê DEM Partî eşkerayîya nuştekîye weşanaye û îfade kerd ke ê seba hêrişê çekdarî zaf xemgîn ê ke qezaya Turgutlu ya Manîsa de lîseyêk de bîyo. Komîsyonan waşt ke hadîse bilez û bi şefafîye bêro roşnkerdene û derheqê heme kes û dezgehan de ke îhmalê înan est o, prosesê edlî û îdarî bêrê ramitene.
Komîsyonan hadîseyê şîdetî zî ardî vîrî ke nê demanê peyênan de Mereş û Riha de mekteban de qewmîyayî. Înan vat ke kulturê şîdet û pêkewtişî yo ke her roje dinyaya pîlan de newe ra berhem dano, şîdeto ke medyaya serdeste normal kena, krîzê ekonomîkî, cinsîyetperestî û heme neseypêyîyî xo waranê cuya domanan de zî danê nawitene. Goreyê komîsyonan, nêzdîbîyayîşê ke tena netîceyan rê mudaxele kenê û badê her hadîse refleksanê emnîyetî virazenê, şîdetî ra nêwedarnenê û zemîno ke ey newe ra berhem dano zî nimnenê.
Komîsyonan eşkerayî de wina vat: “Mektebî ganî bibê warê cuya demokratîke ke tede cîyayîyî pîyaciwîyayîşî musenê, pêkewtişî bi dîyalogî çareser benê û domanî wayîrê vate û qeraran ê. Ganî mekteban de Meclîsê Domanan û Mabênkarîya Akranan bêrê awankerdene. Ganî her mektebî rê bes şêwirmendê psîkolojîkî, psîkologî, pisporê xizmetê komelkî û personelê weşîye bêrê tayînkerdene.”
Komîsyonan îfade kerd ke wezîfeyê heme dezgeh û berpirsîyaran zêdekerdişê refleksanê emnîyetî nîyo, seba kokdarbîyayîşê kulturê haştîye, piştîpêdayîş û pîyaciwîyayîşî girewtişê berpirsîyarî yo. Înan vat ke ganî Wezîrê Perwerdeyî yê Neteweyî û berpirsîyarê bînî hesab bidê ke polîtîkayanê perwerdeyî ver bi rengêko yewperest, cinsîyetperest û antîdemokratîk benê. Komîsyonan dîyar kerd ke DEM Partî do awankerdişê haştîye, pîyaciwîyayîş û komelê demokratîkî de israr bikero.
