Cevher Ay ame tehlîyekerdene ke Hepisxaneyê Hûmare 1 yê Tîpê Fyî yê Kiriklarî yê Îzmîrî de bi pêroyî 22 serrî hepis de mendbî. Ayî vat ke o bi heyecan o ke xebatanê prosesî de ca bigîro.
Cevher Ay o ke 10 serrîyo hepis de yo, Hepisxaneyê Hûmare 1 yê Tîpê Fyî yê Kiriklarî ya ke qezaya Buca ya Îzmîrî de ame tehlîyekerdene. Ay demanê cîyayan de bi pêroyî 22 serrî hepis de mendbî.
Ay verê hepisxaneyî de hetê keyeyê xo û EGE-TUHAYDER ra bi vilikan ame pêşwazîkerdene.
Ayî verê hepisxaneyî de qisey kerd û ard ziwan ke verdayîşê embazanê xo yê serranê dergan ey hîsdar keno. Ayî îfade kerd ke moralê embazanê hepisxaneyî rind o û wina vat: “Merdim ke embazanê xo zere de verdano û vejîyeno, hîsdar beno. Moralê heme embazan rind o. Ê zerrî ra prosesî ra bawer kenê û bawerîya înan pê est a. Şarê ma rê selamê înan est ê.”
Ayî dîyar kerd ke hêvîya tepişteyan a ya ke proses dewam bikero û heme kesê têkildarî rolê xo bigirê: “Hêvîya înan a yo ke proses dewam bikero, heme kesê ke ganî prosesî de rol bigirê aktîf bibê û proses bi serkewtişî biqedîyo.” Ayî vat ke ê wazenê merdimê bindestî û îstîsmarkerdeyî biresê azadîye.
Ayî wina dewam kerd: “Heme kes zerrî ra bawer keno nê prosesî ra ke Rayberîye aver berdo û ma ey ra bawer kenê. Fehmo newe yo sosyalîst do pêşengîya ey de nê herran ser o bêro awankerdene. Ez bi xo zî biheyecan a ke biba kerdoxê nê xebatan.”
Cevher Ay tarîxanê cîyayan de û bajaranê cîyayan de çar rey ame tepiştene. Ay tewr peynî serra 2016î de Edîrne de ame destbendkerdene. Dadgehî Ay bi îdîaya endambîyayîşê rêxistine tepişt. Ay demêk Hepisxaneyê Tîpê Fyî yê Edîrne de mend, dima Hepisxaneyê Hûmare 1 yê Tîpê Fyî yê Kiriklarî yê Îzmîrî rê ame şawitene.
