Amed – Serekê Daîreya Çand û Hunerî yê Şaredarîya Peyasî Yılmaz Guneşî da zanayene ke ê wazenê humara Zarokîstanan zêde bikerê û keyeyan zî pîya tewrê nexşeraya pêvajoya ziwanî bikerê.
Nêmserra neweye yê perwerdeyê Zarokîstananê ke girêdayeyê şaredarîyanê Amedî yê 9ê Êlule de dest pêkerd. Zarokîstana 450 Evlerî de 138, Zarokîstana Bagcilarî de 150, Odeyanê Kayî yê Sumerparkî de 160 û Odeyanê Kayî yê Konutanê Sosyalan de 60 gedeyî, pêro pîya 508 gedeyî xizmetanê verê mektebî ra îstîfade kênê. Kreş û odeyanê kayî de seba gedeyanê 3 heta 6 serran xizmet yeno dayene. Çarçeweya nê xebatan de atolyeyê drama, muzîk, şano, felsefe, werzîş û hunerî yenê organîzekerdene. Her wiha, werdê gedeyan bi bernameyêka ke diyetîsyenanê pisporan amade kerda yeno dayene. Perwerdeyo ke zaf ziwanîye esas gêno, mîyanê hefteyî de mabênê seatanê 08.00 û 16.00î de berdewam keno.
Serekê Daîreya Kultur û Hunerî yê Şaredarîya Peyasî Yilmaz Guneşî derheqê xebatanê xo yê ziwan, kultur û hunerî ser o Ajansa Welatî rê qesey kerd.
‘Awankerdena mudurîya ziwanî gamêka xeylî muhîm a’
Yilmaz Guneşî da zanayene ke ê sey rayberîya herêmî hewldanê ke bajarê xo de derûdorêka kurdkî awan bikerê û wiha vat: “Ma sey rayberîya herêmî wazenê bajarê ke kurdî tede cewiyenê, derûdorêka kurdkî uca de biyero awankerdene. Seba na yewe zî rayberîya ma ya herêmî konferansê xo yê pêroyî de qerêrêk girewt. No qerar zî wina bî: Wa pêro şaredarîyê ma qerarê awankerdena mudurîya ziwanî bigîrê. Meclîsê şaredarîya ma zî kombîyayişê aşma tebaxe de wina qerar girewt. Mudurîya ziwanî seba xebatanê ziwanî gamêke xeylî muhîm a.”
‘Qeyûman zereyê Zarokîstanan tal kerdbî’
Yilmaz Guneşî derheqê xebatanê Zarokîstanan de destnîşan kerd ke wextê qeyûman de zereyê Zarokîstanan ameya talkerdene û wina ard ziwan: “Zarokîstan zî sey reng û rayêka rinde vakurê Kurdîstanî de 2012 ra heta ewro dewam keno. La çiheyf ke mabênê serranê 2016 û 2024î de qeyûman zereyê Zarokîstanan tal kerd. 2024 ra pey, reyna newe ra zarokîstanî kewtî rojeva ma, rojeva rêveberîya herêmî. Nika ser naye kêmî zêde xebatê ma estê.”
‘Zarokîstanî besê keyeyan nêkenê’
Yilmaz Guneşî seredayînanê seba demê neweyî ser o vat ke xeylî keyeyan seredayîn kerd la înan nêeşkîyayî ke pêro gedeyanbigirê Zarokîstanan û qeseyê xo wina domna: “Demê seredayînan de 500 keyeyî ameyî la ma nêeşkîyayî pêro gedeyan bigîrê. Çiheyf ma teyna nêzdîyê 130 keyeyî eşkîyayî bigîrê. Demanê verênan de qezaya ma de 2 Zarokîstanî bîy, ma nika yewna zî akerd la reyna zî besê keyeyanê ma nêkenê. Ma wazenê demê ameyoxî de hem humara Zarokîstanan zêde bikerê hem zî keyeyan tewrê nê bernameyê raya pêvajoya ziwanî bikerê. Nika kar û xebatê ma serê naye dewam kênê.”
‘Xebatê ziwanî gani tenê yew qade de sînordar nêmanê’
Yilmaz Guneşî ard ziwan ke xebatanê ziwanî mirov nêeşkeno tena Zarokîstanan de sînordar bikero û qeseyê xo wina bi peynî kerd: “Ziwan mîyanê komelî de eşkeno pelanê xo hîra bikero. Sazî û dezgehanê ma yê perwerdeyî de, mîyanê pergalî de reyna dersê ma yê ziwanî estê. Pêro qadanê ma yê perwerdeyî de perwerdeyê ma yê ziwanî estê. Ma nêeşkenê vajê ‘eno bes keno, eno bes nêkeno’. Demê ameyoxî de serê nê babetan de şaredarîya ma ya Peyasî zî şaredarîyê ma yê bînî zî berpirsîyar ê. Mîyanê civakî de xebata tewr girîng xebata kultur û ziwanî ya. Eke ma eşkayî her kuçe û taxe de xebatanê ziwan û kulturî raver berê, a wext ma eşkenê vajê ma karekî serkeftî kerdo. A wext eşkenê vajê ma karekî muhîm kerdo.”
