Cenazeyê Zehra Kisaoglu (Raperîne) û Suheyla Kaya (Zîlane) ke nasnameyê înan badê 9 serran ame tesbîtkerdene, Kanîreş de bi sloganê “Şehîd namirin” ameyî definkerdene.
Keyeyanê Zehra Kisaoglu (Raperîne) û Suheyla Kaya (Zîlane) ke serra 1999î de şehîd bîbî, 17ê êlule de xeber girewte ke testê DNA pê girewto; dima ra muracatê Mudurîya Goristanan a Zincirlikuyu kerd û şîyî Goristanê Kîlyosî. Cenazeyî vizêr Îstanbul ra kewtî rayîr û ewro resayî qezaya Kanîreş.
Cenazeyê her di şehîdan dewa Çatax a Kanîreşî de ameyî pêşwazîkerdene. Dima cenazeya Suheyla Kaya (Zîlane) sifte ame berdene dewa Kargapazarî ke keyeyê aye uca yo û nêzdîyê keyeyî de ame definkerdene. Şarî rêze girewt û bi sloganê “Şehîd namirin” defin kerd.
“Zehra Kisaoglu (Raperîne) ameye definkerdene”
Dima cenazeya şehîde Zehra Kisaoglu (Raperîne) dewa Kargapazarî ra kewte rayîr û resaye dewa Çira Corî. Cenaze ewilî ame berdene keyeyê aye, dima ra ame berdene gorî ser o.
Badê definkerdişî şarî seba şehîdanê Kurdîstanî rêze girewt û sloganê “Şehîd namirin” û “Jin, jiyan, azadî” eştî.
Tazîyeyê her di şehîdan do hîrê rojan dewam bikerê.
Goristanê Garzanî de çi bîbî?
Demê prosesê çareserîye yê 2013-2015 de cenazeyê 282 gerîlayanê PKKyî ke herêmanê cîya-cîyayan ê Bedlîsî de bîyî, ameybî berdene Goristanê Garzanî yê Taxa Olekê Corîn. Bi qerarê Walîtîya Bedlîsî 19ê kanûna verêne ya 2017î de goristanî de xeylê gorî ameyî akerdene û cenazeyî seba tesbîtkerdişê nasnameyî ameyî şawitene Dezgehê Tibê Adlî yê Îstanbulî.
21 cenazeyê ke DNAyê înan pê girewt, teslîmê keyeyanê înan bîyî; ame vatene ke cenazeyê bînî Goristanê Kîlyosî de ameyî definkerdene. Dima ra eşkera bî ke 261 cenazeyî Kîlyos de herinda goristanî de beşê rayîrê peyayan de ameyî definkerdene.
