Nasnameyê gerîlayanê PKKyî Zehra Kisaoglu û Suheyla Kaya ke Goristanê Garzanî ra ameyî vetene û Îstanbul de, Kîlyos de rayîrê peyayan de defin bîbî, bi pêgirewtişê nimûneyanê DNAyê keyeyanê înan tesbît bi. Pawîyeno ke cenazeyî siba biresê Kanîreş û ûcade berê definkerdene.
Zehra Kisaoglu (Raperîne) û Suheyla Kaya (Zîlane) serra 1999î de şehîd bîbî. Keyeyanê înan 17ê êlule de xebere girewte ke testê DNAyî pê girewto; dima ra muracatê Mudurîya Goristanan a Zincirlikuyu kerd û şîyî Goristanê Kîlyosî.
Birayê Zehra Kisaoglu Abdullah Kisaogluyî vat ke waya ey badê lîseyî keye ra abirîyaye û înan bi serran komgoranê cîya-cîyayan de nimûneyê DNAyî dayî. Kisaogluyî vat ke çar rojan ra ver musayî ke cenazeyê waya ey Kîlyos de yo.
Demo ke cinazeyî ameyî girewtene yew eşkerayîye ameyê dayene. Eşkerayîye de endamê Komeleya Hiqûqnasanê Sêba Azadî (ÖHD) Veysel Demirkaya qisey kerd û va: “Ewro tiya de ma cenazeyê embazanê ma Zîlane û Raperîne teslim girewtî. Cenazeyî, Mezelanê Xerzanî ra be hawado nakokê hiqûqî ameyî ardiş îtîya û îtîya kuçe de ameyî nimitiş. Dima ke eno ame fehmkerdene, keyeyan sêba teslimgirewtena cinazeyanê xo muracaat kerd û badê ci cenazeyî ameyî teslîmkerdene.”
‘Berpirsîyarîya esasî yê dewlete ya’
Demirkaya bal ante ser ke waştena keyeyan bibo nêbo, gerê dezgehê selahîyetdarî cinazeyan tespit bîkerê û teslîmê keyeyan bikerê û wina dewam kerd: “Her çiqas keyeyan muracaat kerdo zî, îtîya de mesulîyeto esasî yê dewlete yo. Cenazeyî be bêhiqûqî ameyî ardiş îtîya. Ma zanenê ke îtîya de bi sedan cenazeyî est ê. Ma dezgehanê selahiyetdaran ra pawenê ke muracaatê keyeyan, berpirsîyarîya xo bîyarê ca, cinazeyan tespît bikerê û teslîmê keyeyan bikerê.”
Keyeyanê ke cinazeyê xo teslîm girewtî zi mesajê “Şehîd şehîdê ma pêrûne yê. Sereyê pêro Kurdîstanî sağ bo” va.
Dîma cenazeyê ke ameyî girewtene, sêba ke berê qezaya Çewlîgî Kanîreş, kewtî raye.
Goristanê Garzanî de çi bîbî?
Demê prosesê çareserîye yê 2013-2015 de cenazeyê 282 gerîlayanê PKKyî ke herêmanê cîya-cîyayan ê Bedlîsî de bîyî, ameybî berdene Goristanê Garzanî yê Taxa Olekê Corîn. Bi qerarê Walîtîya Bedlîsî 19ê kanûne 2017î de goristanî de xeylê gorî ameyî akerdene û cenazeyî seba tesbîtkerdişê nasnameyî ameyî şawitene Dezgehê Tibê Edlî yê Îstanbulî.
21 cenazeyê ke DNAyê înan pê girewt, teslîmê keyeyanê înan bîyî; ame vatene ke cenazeyê bînî Goristanê Kîlyosî de ameyî definkerdene. Dima ra eşkera bî ke 261 cenazeyî Kîlyos de herinda goristanî de beşê rayîrê peyayan de ameyî definkerdene.
