Hemsereka Pêroyî ya DEM Partî çalakîya mexduranê erdlerzî zîyaret kerd ke 11 rojî yo verê Wezaretê Edaletî de nobete gênê.
Hemsereka Pêroyî ya DEM Partî Tulay Hatîmogullari, Serekwekîlê Grûba DEM Partî Sezaî Temellî û Rêxistina Enqere ya DEM Partî nobeta mexduranê erdlerzî zîyaret kerd ke bi talebê muhakemekerdişê kesanê ke îhmalê înan est o, 11 rojî yo verê Wezaretê Edaletî de dest pêkerdo. Mexduranê erdlerzî ser o wezaretî fotografê qurbananê erdlerzî û pankartê ke talebê înan ser o nusîyayê, ronayî. Endam û temsîlkarê partîyanê sîyasîyan û dezgehanê komelkîyan zî seba piştîdayîşî tewrê çalakîye bîyî.
Tulay Hatîmogullari ke nobete zîyaret kerd, sere de talebê mexduranê erdlerzî yew bi yew goşdarî kerdî û not girewt. Dima zî uca de eşkerayîyêk daye.
“Talebê keyeyan bivînê”
Hatîmogullari ard ziwan ke serranê peyênan de erdlerzo tewr gird ciwîyayo û wina vat: “Ma hertim vat erdlerz nêkişeno, rant kişeno. Eke awanîyî goreyê erdlerzî bibîyêne, hende kesî cuya xo ra nêbîyêne. Nika keyeyî edalet wazenê. Wazenê ke berpirsîyarî bêrê muhakemekerdene. Keyeyî vanê ganî dewayî bêceza nêqedîyê ke serebûdê winasî reyna nêqewimîyê. Keyeyî seba naye nobete gênê. Tîya de dayîkêk est a ke domanê xo erdlerzî de vindî kerdê. Ganî wezaret naye bivîno. Ez tîya ra venga polîsan zî dana: Dejê keyeyan bivînê û çalakîye rê asteng mevejê.”
“Ma heta peynî hetê mexduranê erdlerzî de yê”
Hatîmogullari dewamê qiseykerdişê xo de talebê keyeyan ardî vîrî: “Talebê keyeyan no yo ke Wezaretê Edaletî însîyatîf bigîro ke dosyayê erdlerzî bêceza nêmanê. Ma hêvî kenê ke talebê keyeyan bi Wezîrê Edaletî reyde bêro co û edalet bêro temînkerdene. Ma naye sey mexduranê erdlerzî wazenê, sey DEM Partî wazenê. Ma dadgehî ra zî vanê: heta nika axa, beg û mutahîtî ameyî pawitene. Mutahîtan mepawê, edaletî pêk bîyarê. Ma keyeyan rê zî sipas kenê ke seba ke êdî kes erdlerze de nêmiro, çalakîye de yê. Ma heta peynî hetê şima de yê. Têkoşînê şima têkoşînê ma yo.”
Dima keyeyanê erdlerzî qisey kerd û talebê xo ardî ziwan. Mexduranê erdlerzî bi berzkerdişê sloganê “Kes vengê ma eşnaweno?” û “Vîrrakerdiş çin o, efûkerdiş çin o, helalkerdiş çin o” dejê erdlerzî û talebê xo îfade kerdî.
Çalakîya nobete ya keyeyanê erdlerzî do heta pêvînayîşê Wezaretê Edaletî reyde dewam bikero.
