Hemşaredara Şaredarîya Amedî ya Şaristanê Girdî Serra Bucak ke beşdarê çalakîya daşinasnayîşê kitabê Anamnezê Pêroyî yê “Anamneza Giştî” bîye ke bi kurmanckî û kirmanckî ameyo amadekerdiş, dîyar kerd ke seba ke ziwanêk bieşko ganî bimano û aver şêro, ganî heme waranê cuye de bêro xebitnayîş û vat: “Anamnezê Pêroyî seba xebitnayîşê kurdkî yê warê weşîye gamêka muhîm û biqîymet a.”
Kitabê Anamnezê Pêroyî (Anamneza Giştî) ke hetê Odaya Tabîban a Amedî ra bi kurmanckî û kirmanckî ameyo amadekerdiş, bi çalakîya ke Merkezê Kultur û Kongreyî yê Çand Amedî de ameye organîzekerdiş, ame daşinasnayîş. Çalakî de Hemşaredara Şaredarîya Amedî ya Şaristanê Girdî Serra Bucak, Hemşaredarê Verênî yê Şaredarîya Şaristanê Girdî Selçuk Mizrakli û Hulya Alokmen Uyanik, Endamê Konseya Merkezî ya TTB’yî Dr. Mehmet Şerîf Demîr, Endamê Meclîsê DBB’yî, hemşaredarê şaredarîyanê qezayan, serekê daîreyan, temsîlkarê rêxistinanê komelê sivîlî û zaf kesê ke waranê ziwan û weşîye de xebitîyenê, ca girewt.
Akerdişê çalakî Serekê Odaya Tabîban a Amedî Veysî Ulgenî kerd; edîtorê kitabî Elîf Turan, Azad Zal û Hacî Ozkalî derheqê prosesê amadekarîya eserî û muhîmîya ci ya warê weşîye de qisey kerd.
‘Fehmkerdişê nêweşîye %70ê tedawî yo’
Edîtoran bale ante ser o ke ganî nêweşîye bi hewayo raşt bêro fehmkerdiş, dîyar kerd ke anamnez %70ê tedawî virazeno û coka têkilîya nêweş û tabîbî de muhîm o. Edîtoran bale ante ser o ke wexto ke astengê ziwanî est bo, têkilîyêka raşte nêeşkena bêra ronayîş û qeyd kerd ke no kitab do seba xebatanê warî bibo rayberêk û mabênê nêweş û tabîbî de wezîfeyê pirdî bivîno. Edîtoran îfade kerd ke ê bi kitabî amanc kenê çimeyêko zanistî û standard pêşkêş bikerê û demê ameyoxî de amanc kenê ke warê weşîye rê ferhengêko dewlemend o tibî qezenc bikerê.
Mizrakli: Diziwanî bîyayîşê ci zaf biqîymet o
Selçuk Mizrakliyî zî dîyar kerd ke seba her tabîbî têkilî ronayîşê nêweşî reyde bi ziwanê dayike zaf muhîm û biqîymet o û va: “Eke ma kitabêko bi xusûsîyetêka hîna pispore vejenê, nêbîyayîşê kirmanckî do kêmanîyêka girde bibîyêne, diziwanî bîyayîşê ci zaf biqîymet bî. Ma tarîx nusenê, tabîbê Amedî tarîx nusenê, embazê ma bi nimûneyanê xo nawnenê ke ma tarîx ciwîyenê.”
Hemşaredare Bucak: Ziwan wexto ke bikewo heme waranê cuye, xurt beno û aver şino
Hemşaredara Şaredarîya Şaristanê Girdî Serra Bucake zî zordayîşê tarîxî yê ser kurdkî ardî ziwan û tekîd kerd ke îdareyê herêmkîyî do xebatanê xo yê waranê ziwan, edebîyat, huner û termînolojîya şaredarîye bêvindertiş dewam bikerê. Hemşaredare Bucake vat: “Ewro ma tîya tena seba daşinasnayîşê kitabêkî nêameyî têhet. ‘Anamnezê Pêroyî’ seba xebitnayîşê kurdkî yê warê weşîye gamêka muhîm û biqîymet a. Pawitişê ziwanêkî tena bi qiseykerdişê rojane, bi deyîr, şîîr û edebîyatî mumkun nîyo. Seba ke ziwanêk bieşko ganî bimano, aver şêro û biresno neslanê neweyan, ganî o ziwan perwerde, weşî, zanist, huqûq û xizmetanê pêroyîyan de zî bêro xebitnayîş.
Têkilîya mabênê nêweş û tabîbî parçeyêkê resayîşê xizmetê weşîye yo seypê yo
Warê weşîye nê mesela de wayîrê muhîmîyêka taybete yo. Seke şima zanê, merdim dej, nêweşî û çîyanê ke ciwîyeno tewr rind bi ziwanê xo îfade keno. Têkilîya mabênê nêweş û tabîbî tena meseleyêka ziwanî nîya. No eynî wextî de parçeyêkê heqê resayîşê xizmetê weşîye yo biqalîte û seypê yo. Coka averberdişê termînolojîya tibî ya kurdkî û amadekerdişê çimeyanê ke tabîb û kedkarê weşîye eşkenê bixebitnê, zaf muhîm o. Na rewşe vernîya xebitnayîşê kurdkî yê waranê zanistî û meslekîyan zî akena. Ma sey îdareyanê herêmkîyan wazenê ke kurdkî tena keye û cuya rojane de ney, waranê pêroyî, dezgehî, zanistî û meslekîyan de zî ziwanêko ganî û fonksîyonel bo. Ziwan wexto ke bikewo heme waranê cuye, xurt beno û aver şino.
Ziwan, çiqas bêro xebitnayîş hende ciwîyeno
Semedê nê heme sebeban ra ‘Anamnezê Pêroyî’ seba ma tena kitabêk nîyo. Seba xebitnayîşê hîna zêde yê kurdkî yê warê weşîye gamêk û seba xebatanê ameyoxan zemînêk o. Semedê na xebata biqîymete ra ez Odaya Tabîban a Amedî, tabîban, pisporanê ziwanî û herkesî rê ke keda ci nê kitabî de ya, pîroz kena û sipas kena. Ez hêvî kena ke na xebate bibo destpêkê xebatanê sey ferhengê tibî, materyalê perwerdeyî, cigêrayîş û weşananê neweyan. Çunke seke ma zanê: Ziwan çiqas bêro xebitnayîş hende ciwîyeno, çiqas bêro berhemardiş û resnayîş hende dewlemend beno û ameyoxê xo awan keno.”
Xizmetanê weşîye de baleantişê ziwanê dayike
Bernameyî bale ancîyaye muhîmîya xebitnayîşê ziwanê dayike yê xizmetanê weşîye ser o û bi erjnayîş û qiseykerdişanê beşdaran qedî
