Sûdan de cinî şer û zextanê komelkî yê giranan reyde rî bi rî manenê, kulturê Aghanî Albanat, cinîyanê rê hîkayeyê xo, waştişê xo û îtirazê xo yê vera rolanê cinsîyetî yê komelkî bi rayîrî muzîgî neqil kenê.
Sûdan, pêkewtişan reyde, bi binpaykerdişanê giran ê heqanê vera cinîyan yê zî rojev de ya. Problemê sey herimnayîş, emrê qijî de zewicîyayena û binpaykerdişê heqê perwerdeyî, cuyayîşê cinîyan ser o tesîrêko xorîn keno. Vera nê tabloyî, kulturî yo muhîm ra yewe zî Aghanî Albanat ke vengê cinîyanê Sûdanijan resneno dinya.
Taybetî nê deyîrê ke sinifa karkeran yê cinîyan vanê, qala cuya rojane, eşq, cuyayîşê karî û zextanê cinsîyetî yê komelkî kenê. Cinî, bi rayîrî muzîgî, tecrubeyanê xo îfade kenê û hemverê rolê ke seba înan ameyê dayîş rê vejîyenê, hîkayeyanê xo bi vatişanê xo newe ra awan kenê.
Hunermenda retro-pop a Sûdanij Alsarah, temsîlkarê nê kulturî ra yew a, ke muzîkê xo de nê mîrasî domnena. Alsarah, ke gedeya keyeyêka pawitoxê heqê merdiman a, badê derbeya 1989î ra bi keyeyê xo ra remaya Yemen. Rîyê şerê zereyê ke Yemen de 1994î de dest pêkerdbi, sey îltîcakerdoxêk sîyasî DYA’yî de bi ca bîya. Hunermenda ke perwerdeya etnomuzîkolojî girewta, bi birayê xo Nahid ra 2010î de grûbê Alsarah and the Nubatones awan kerd.
Deyîrê “Habibi Safr Mini” û “Jibal Alnuba”, yê ke Alsarah û Nahidî vate, mîyanê eseranê ke dinya rê kulturê Aghani Albanat dano mojnayîşî de ca gênê. Deyîrê ke bi hawayêko acapella ameyê pêserkerdene, qalê hîkayeyê cinîya ke mîyanê rewşa xizanîyê de cuyena, kenê.
Rixmê kedero ke deyîre xo de hewînena zî, rîtmê aye, aye vurnena deyîrêka weş a ke Sûdan de veyve û şahîyan de yena vatene. Bi no hawa, cuya rojane ya cinîyan, hesretê înan û têkoşînê înan bi rayîrê muzîkî neqlê neslan beno.
