Hasan Atîlla Ugur o ke bi kiştişê 22 welatijanê kurdî û sey berpirsîyarê JÎTEMê Qoserî yeno şinasnayene, çarçewaya mergê endamê MÎT’î Kaşîf Kozînoglû de ame destbendkerdene.
Endamê MÎTî Kaşîf Kozînoglu serra 2011î de Hepisxaneyê Marmara de cuya xo ra bîbî. Seredozgerîya Komare ya Silivrî derheqê mergê Kozînoglû de cipersayîş dabî dest pêkerdene. Çarçewaya cipersayîşî de derheqê 4 kesan de qerarê destbendkerdişî amebî dayene. Mîyanê kesê ke derheqê înan de qerarê destbendkerdişî ameyo dayene de Hasan Atîlla Ugur zî est o.
Hasan Atîlla Ugur kiştişê 22 welatijanê kurdî ra sey berpirsîyarê JÎTEMê Qoserî û veşnayîş û vengkerdişê dewanê kurdan yeno şînasnayene.
Hasan Atîlla Ugur Kibris ra wexto ke ameyene Tirkîya Teyaragehê Îstanbulî de ame destbendkerdene. Atîlla Ugur seba karûbaranê îfadeyan berd Fermandarîya Cendirmeyan ê Maslakî.
