Wezîfeyê Hemşaredarîya Şaredarîya Amedî ya Şaristanê Girdî rê Endamê Meclîsî Emîn Ay ame weçînayene.
Dogan Hatunî ra dima ke çarçewaya “Prensîbê Xopeyserantişî” de wezîfeyê Hemşaredarîya Şaredarîya Amedî ya Şaristanê Girdî ra îstîfa kerdbî, prosesê dîyarkerdişê hemşaredarê neweyî temam bî. Hetê Heyetê Îdareyanê Herêmkîyan ê Demokratîkan ê Partîya Seypêyî û Demokrasî ya Şaran (DEM Parti) ra, goreyê usûl û esasanê ke Belgeya Helwêstî ya Îdareyanê Herêmkîyan ê Demokratîkan de dîyar bîyî, erjnayîşî ameyî kerdene û netîce de Endamê Meclîsê Şaredarîya Amedî ya Şaristanê Girdî Emîn Ay wezîfeyê Hemşaredarîya Şaredarîya Şaristanê Girdî rê ame weçînayene.
Proses bi aqilo hempar û îradeyê kolektîfî ame ramitene
Goreyê îzahatî ke hetê Kombîyayîşê Îdareyanê Herêmkîyan ê Demokratîkan ê DEM Parti ra ame kerdene, prosesê dîyarkerdişê hemşaredarê neweyî de, sere de Meclîsê Şaredarîya Amedî ya Şaristanê Girdî, rêxistinê bajar û qezayan û dezgeyanê demokratîkan reyde qisey bîyo.
Qiseykerdişan de erjnayîş û pêşnîyazê nê sazgehan ameyî girewtene; pêşnîyazê ke vejîyayî meydan, hetê Heyetê Îdareyanê Herêmkîyan ê Demokratîkan û heyetanê partî yê eleqedaran ra ameyî erjnayene. Erjnayîşanê hemparan ra dima, qerar ame girewtene ke Emîn Ay wezîfeyê Hemşaredarîya Şaredarîya Amedî ya Şaristanê Girdî bikero.
Bale ancîyaye beşdarîya demokratîke û aqilê hemparî ser o
Îzahatê Heyetê Îdareyanê Herêmkîyan ê Demokratîkan de bale ame antene ser o ke hemşaredarî tena yew modelê îdarekerdişî nîya; no sîstem mekanîzmayanê demokratîkan ra yew o ke îdarekerdişî de beşdarîya komelî ya rasteraste xurt keno û îradeyê şarî beno merkezê prosesanê qerargirewtişî.
Îzahatî de ame vateneke demê neweyî de zî şaredarîya komelê demokratîkî ke îradeyê şarî, aqilo hempar û beşdarîya demokratîke esas gêna, do dewam bikero; Emîn Ayî rê wezîfeyê ci yê neweyî de serkewtiş ame waştene.
Şaredarîya Amedî ya Şaristanê Girdî zî Hemşaredar Emîn Ayî rê wezîfeyê ci yê neweyî de serkewtiş wast û dîyar kerd ke fehmê şaredarîya komelkî ke îradeyê şarî, aqilo hempar û beşdarîya demokratîke esas gêno, do bi qerardarî dewam bikero.
Îzahatî de “Şaristanê ma û şarê ma rê xeyrên bo” ame vatene.
Emîn Ay kam o?
Emîn Ay serra 1970î de dewa Xerzika (Tuzla) ya girêdayeyê qezaya Pasûrî ya Amedî de ame dinya. Ay medreseyanê cîya-cîyayan de perwerde dî û mezûnê Fakulteya Îlahîyatî yo. Ay Meclîsê Partî yê HDPyî de wezîfe girewt, serranê dergan de mîyanê Kongreya Îslamîya Demokratîke de xebitîya û weçînayîşanê herêmkîyan ê 2024î de qezaya Çinarî ra sey endamê Meclîsê Şaredarîya Amedî ya Şaristanê Girdî ame weçînayene. Ay zewicîyaye yo û pîyê 7 tutan o.
