HPG: “Şehîdanê ma heqîqetêko hende gird afirna ke her demê cuya înan, her vateyo ke vat û her vindertişo ke mojna, vîrê ma de bi ca bîyî, kewt xobîyayîş û zerrîya ma.”
Merkezê Têkilîya Çapemenîye yê HPGyî eşkerayîya xo de xoverdayoxê Roja Mergî ya Girde ya 14ê temmuze û qadroyê rayberî yê têkoşînî – Kemal Pîr (7ê êlule 1982î), Mehmet Hayrî Durmuş (12ê êlule), Akîf Yilmaz (15ê êlule) û Alî Çîçek (17ê êlule) – serrgêranê şehadetê înan de bi heskerdiş, hurmet û pabestîye ardî vîrî û bi şexsê înan heme şehîdê têkoşînî silam kerdî.
HPGyî vat ke rojanê peyênan de şarê Vakurê Kurdîstanî hewt ra heta hewtayî şehîdê xo ardî vîrî û no wayîrvejîyayîşo pêt reyna mojna ke vîrê şehîdan zerrîya şarî de senî ganî yo û çimeyê tewr pêtî yê moral û manewîyatî Şehîd û Rayberî yê. HPGyî keyeyanê şehîdan, Rayber Apoyî û her kesê ke zerrîya ci bi şehîdan reyde kuwena, serweşî waşte.
‘No mîras çimeyê moral û qewetî yo, garantîya sibayanê azadan ê şarê ma yo’
Eşkerayîye de ame vatene ke cuye û şehadetê her şehîdî heqîqetêko şênber o ke mojneno merdimo azad tena seba çi ney, senî zî ciwîyeno: “Sey peyrayanê şehîdan ma ge bi sebebê şertanê şerî ge zî bi sebebê bêîmkanîye nêeşkayî cuya têkoşînê şehîdanê xo bi heme hetan belge bikerê; seba wezîfeyanê ke ma tede kêmî mendî verê heme şehîdanê xo û şarê xo rê xorexne kenê û qerardar ê ke nê kêmanîyan telafî bikerê. La şehîdanê ma heqîqetêko hende gird afirna ke ma resayî raştîya şarêk ke xo bi şehîdanê xo awan keno, bi înan pênase keno û înan bêmerg keno. No mîras hem çimeyê ma yo tewr gird ê moral û qewetî yo hem zî garantîya sibayanê azadan ê şarê ma yo.” HPGyî bawerî mojnaye ke şarê welatperwer tena bi merasiman, her demê cuya xo de vindertişê exlaqî, cuya komunale, hevaltî û fedakarîya şehîdan esas gêno û her kesê ke bi keye, dua, mesaj û keda xo beşdarê merasimanê yadkerdişî bî, înan rê sipas kerd.
‘Rayîrê vîrê şehîdan de gandayîş, tewr kêmî sey şehîdbîyayîşî manadar o’
HPGyî ard ziwan ke prosesê yadkerdişan de serebûdêko xemgîn zî qewimîya: birayê Şehîd Arîn Goyî – Bînevş Oslo, Remezan Oslo, wexto ke seba beşdarîya merasimê Qilebanî Manîsa ra kewtbî rayîr, 11ê êlule 2026î de qezaya trafîkî de cuya xo ra bî û çar kesî, yewê înan giran, birîndar bîyî: “Rayîrê vîrê şehîdan de gandayîş, tewr kêmî sey şehîdbîyayîşî manadar o.” HPGyî welatperwer Remezan Oslo bi hurmet ard vîrî û keyeyê Oslo û eşîra Goyî rê serweşî, birîndaran rê şîfa waşte.
