Gerîlayê Azadîya Kurdîstan yê ke şehîdbîyayena înan ameya eşkerekerdene yenê virardene. Bi hezaran kesî tevrê vîrardenan bîyî û waştena azadîya Rayberê Şarê Kurd Abdullah Ocalanî ameyê waştene.
Êlih de programê virardene yo ke pêşengîya MEBYA-DERî de seba şehîdanê têkoşîna azadîya Kurdan ê ke tarixan û cayanê cîya cîyayan de weşîya xo dest dabî Taxa 19’ê Gulane ya Merkezê Êlihî de amebî organîzekerdene, roja dîyine de dewam keno.
Vîrardena ke zaf kesê ke temsîlkarê sazîyan û partîyanê sîyasîyan tewrê ci bîyê ra ver bi hezaran kesan rayîrşîyayîşêk viraşt. Rayîrşîyayiş de girseye sloganê “Bijî Serok Apo” û “Raya şehîdan rêya ma ya, PKK partîya ma ya” berz kerdî.
Bedlîs
Bedlîs de vîrardena ke bi pêşengîya MEBYA-DER’î de ameyê kerdene bi sloganan dest pê kerd. Keyeyê şehîdan, temsîlkarê partîyanê sîyasîyan û sazîyanê komelîyan zî tede xeylê kesî tewrê bîranîne bîyî. Cayê vîrardene de resimê Rayberê Şarê Kurdî Abdullah Ocalanî ame dardekerdene. Resmê şehîdan bi renganê kesk, sor û zerdî ameyî xemilnayene, pankartê bi nuşteyê “Şehîdê ma rûmeta ma yê”, “Şehîdî ronahîya rêya ma yê” ameyî daliqnayene. Vîrardene bi serdayînan dewam keno.
Colemêrg
Virardena şehîdanê Tegêrayişê Azadîya Kurdîstanî Colemêrge de roja xo ya dîyine de bi serdayînanê girseyîyan dewam kena. Virardene ke Eywana Dogu Place ya taxa Baglarî ya Merkezê Colemêrgî de ameya amadekerdene, roja dîyine de bi tewrbîyena hezaran kesan dewam kena. Di bîranîne de royê şehîdan rê duayî ameyî wendene. Xeylê mesajê sersaxîye yê ke teberê welatî ra, Fransa, Îngiltere û Belçîka ra amebî, ameyî wendene. Dayîkê Aştîyê yê Geverî û malbatê şehîdan ê Çelê zî tewrê virardene bîyî. Vîrardene ewro saete 18:00 de do peynî bena.
Agirî
Qezayanê Bazîd û Panosî yên Agirî de zî seba şehîdan vîrardenî ameyî viraştene. Bazîd de Mala Şînî ya Mudur Arasî de, Panos de zî Keyeyê tazîyeye ya goristanî de virardene amê kerdene. Keyeyê şehîdan, Hemsereka Pêroyî ya DEM Partîyê Tulay Hatîmogûllari û temsîlkarê sazîyanê sivîlan tewrê bîranîne bîyî.
Îdir
Îdir de zî bi pêşengîya MEBYA-DER’î vîrardena şehîdan Keyeyê sersaxîye yê taxa Ozgurî de roja dîyine de dewam kena. Girseyê şarî serdana vîrardene kenê. Vîrardene de sloganê “Şehîd namirê” ame qîrayene.
Îzmîr
Qeza Buca ya Îzmîrî de zî bi pêşengîya EGE-MEBYA-DERî ya Egeyî seba şehîdanê têkoşîna azadîye, bernameyê vîrardene yê Komeleya Piştgirîya Pasûrîyana ke Taxa Çamlikule de ya, roja xo ya diyîne de dewam kerd. Tevlê temsîlkarê partîyanê sîyasîyan û sazîyanê civakîyan xeylê kesî tewrê vîrardene bîyî. Salona ke vîrardene tede ameyê kerdene de pankartê “Şehîd namirê” û “Mirena li ser rêya egîdan dibe cîhan” û posterê Rêberê Şarê Kurd Abdullah Ocalanî û şehîdan ameyî daliqnayene.
Erzîrom
Qezayanê Qereyazî, Qereçoban, Tatos û Xinûsî yê Erzîromî de zî bi pêşengîya MEBYA-DER’î seba şehîdanê Têgêrayişê Azadîya Kurdîstanî yê ke ca û tarixanê cîyayan de şîyî heqîya xo, vîrardenê yene kerdene. Vîrardenan de seba şehîdan duayî yenê wendene û sloganê “Şehîd namirê” yene berzkerdene. Alîkarê Hemserekanê Pêroyî yê DEM Partîye Mahfûz Guleryuz, Hemverfeka HDK’î û parlamentera Erzîromî Meral Daniş Beştaş û xeylê welatîjî serdana şînan kenê û serweşîye danê keyeyan.
Qers
Qers de zî bi pêşengîya MEBYA-DER’î de seba kesanê ke têkoşîna azadîya Kurdan de dem û mekananê cîyayan de şîyî heqîya xo vîrardenêk yena kerdene. Vîrardene banê DEM Partîyê yê Qersî de bi dirûşman dest pê kerd. Keyeyê kesê ke şîyî heqîya xo, Hemserekê Pêroyî yê DEM Partîye Tuncer Bakirhan, Parlamentera Qersî Gulistan Kiliç Koçyîgît, temsîlkarê partîyanê sîyasîyan û sazîyanê sivîlan û xeylê welatijî tewrê bîranîne bîyî. Salona ke bîranîne tede yene kerdene de, resimê şehîdan û posterê Rayberê Şarê Kurdî û pankartê “Şehîd namirê” ameyî daliqnayene. Vîrardene de bi rêzgirewtene dest pê kerd, sloganê “Şehîd namirê” û “Bijî Serok Apo” ameyî berzkerdene.
Semsûr
Semsûr de vîrardene ke MEBYA-DER pêşengiya ci keno roja dîyine de ya. Merkezê bajarî ra, qezayan û dewan ra komê girseyî serdana Keyeyê Tazîyeye ya Mehmet Erdemoglû kerdî û sloganê “Şehîd namirê”, “Rêya to rêya ma ya ey şehîd”, “Bijî Serok Apo” qîrayî. Vîrardene de bi nameyê MEBYA-DER’î eşkerayî ame dayene û ame vatene: “Şehîdê ma seba nê şarî têkoşîn da ramitene û canê xo feda kerd. Ma do serê şopa înan de bimeşîyî.” Vîrardene bi serdayînan dewam kena.
