Stenbol – Nevzat Fîdan ku di sala 1990î de tev li nav refên tevgera azadiyê dibe, di sala 1995an de li Kerboranê şehîd dikeve. Malbata Fîdan piştî 31 salan şîna Nevzat Fîdan danî. Birayê Nevzat Fîdan, Bekîr Fîdan diyar kir ku ew piştî 31 salan şîna birayê xwe danîn û got ku ew ji bira û şehîdên xwe razî ne.
Piştî Tevgera Azadiya Kurdistanê endamên xwe yên di dem û cihên cuda de şehîd ketine aşkere kir, gelek çîrokên lehengî û berxwedaniyê derketin holê. Bi van çîrokan gelê Kurd careke din dît ku zarokên wan ji bo parastina rûmeta gelê xwe çawa li ber xwe dane û têkoşiyane. Yek ji wan lehengan jî Nevzat Fîdan ê bi navê kod Arat e. Nevzat Fîdan li Navçeya Stewrê ya Mêrdînê hate dinê û beriya naskirina tevgera azadiyê mamostetiyê dike. Nevzat Fîdan bi avabûna PKKê re di nava partiyê de cih digire. Piştî ku partiyê nas kir, heta emrê xwe dawî kir li pey doza xwe çû. 8 salan di girtîgehê de ma û tevî îşkenceyên giran a li Girtîgeha Amedê tu gav paşve neavêt û têkoşiya. Piştî ji girtîgehê derket di sala 1990î de berê xwe da çiyayên Kurdistanê û tev li gerîlayan bû. 5 salan li çiyayên Kurdistanê gerîlatî kir û tevî salên zehmet bi awayekî serkeftî têkoşiya. Û di sala 1995an de li navçeya Kerboranê şehîd ket.
Bi tevlibûna Nevzat Fîdan û hevalên wî li Gundê Barman ê navçeya Stewre ya Mêrdînê Tevgera Azadiya Kurdistanê tê nasîn. Bi saya Nevzat û hevalên wî ala Tevgera Azadiya Kurdistanê li Gundê Stewrê bilind dibe. Bi dehan kes li pey rêya Nevzat û hevalên wî tev li têkoşînê dibin. Li pey rêça wan bi dehan ciwanên Kurd di azadiya gelê xwe de canê xwe didin û dibin lehengê Gundê Barmanê. Îro bi dehan şehîdê Gundê Barmanê hene. Ala azadiyê bi destê nifşên nû li Gundê Barmanê bilind dibe.
Birayê Nevzat Fîdan Bekîr Fîdan têkildarî jiyana birayê xwe û şînê ji ajansa me re axivî.
‘Em ji Nevzat û şehîdên xwe razî ne’
Bekîr Fîdan diyar kir ku Nevzat di nava xebatan de bûye û wiha axivî: “Nevzat ji avabûna partiyê ve di nava tevgerê de bû. Nevzat li Mûglayê mamostekî dikir. Paşê di sala 1982yan de hate girtin. 8 sala li Girtîgeha Amedê hate ragirtin. Piştî di sala 1990î de hate berdan tev li gerîla bû. Piştî wê me tu agahî jê negirt. Heta îro ez hevalên Nevzat nas dikim gelek baş qala Nevzat dikin. Beriya heftekî agahî ji me re hate ku Nevzat di sala 1995an de şehîd ketiye. Piştî 31 salan me şîna Nevzat danî. Em Nevzat û şehîdan xwe razî ne. Dema kesek şehîd dikeve mirov dixwaze şîna xwe danê. Me jî piştî 31 salan şîn danî. Aliyek em xemgîn jî bin keyfa me hat ku me şîna Nevzat danî.”
