ÇEWLÎG – Dewa Gaşîrêzî ya ke girêdayeyê qezaya Darahênî ya seba ke dinamo xerepîyayo aşmêka awa dewe ya şimitişî çin a. Qeymeqam meseleya awe çareser nêkeno û vano, “Dewlete seba viraştene pere nêdana, şima xo rê awa xo virazê.”
Dewa Gaşîrêzî ya ke girêdayeyê qezaya Çewlîgî, Darahênî ya aşmê ra zafêrî yo ke tede awa werî çin a. Seba ke dînamoyê awê yê sondajî xerapîyayeyo awe nêyena dewe. Dewijan ra 2-3 kesî seba ke yew çareserîye bivênê şîyê hetê qeymeqamî, goreyê vatîşanê înan qeymeqam yew çare nêvirazeno û dewijan ra vano, “Pere çin o, dewlete pere (odenek) nêdana ma, şima dewijî şirê bi îmkananê xo awa xo virazê.”
Dewede 40 kêyeyî est ê, saetê aboneyê awe est ê û her aşme zî dewijî heqê awe danê la qeymeqam reyna zî seba awe çareserî nêvîneno. Mîyanê dewede nufusê kal û pîran zêde yo û nêweşî zî est ê. Dewijî şonê dewanê bînan ra awe anê. Kincanê xo benê cayanê bînan de şûnê. Seba ke awe çin a, domanî pak nênê şutene û benê nêweş. Dewijan seba nê problemê xo ajansê ma (Ajansa Welat) rê qisey kerd û vat: “Dewlete gerê problemanê şarî çareser bikero, la problemanê ma çareser nêkenê. Gerê Dewlete bilez nê problemê ma çareser bikero.”
Cînîyêka 100 serre ye: Ma nêeşkenê îtîya de awe biwerê
Hasret Karakaşe 100 serreya, endî dest û lingan ra kewt a, seba ke awa dewa înan çin a hetê weşîya xo ra zaf zehmetîyan ancena. Hasret Karakaşe reaksîyon dana û awe ser wina qisey kena, “Awa ma çin a, ma nêeşkenê desmaj bigîrê, nêeşkenê yo kulmê awe biwerê. Homa belayê înan bido.”
Gerê problemê awe bêro çareserkendene
Meryem Narîne zî vat seba ke awa înan çinîka nêşkenê ke putanê xo buşîyê, putanê xo benê şaristan de şunê. Meryem Narîne vat gerê problemê awa înan hetê dewlete ra bêro çareserkerdene.
Nêweşê Dîyalîzî: Ez nêeşkena dermananê xo biwerê
Recep Narîn zî nêweşo û tedawîyê dîyalîzî vêneno. Seba ke dewa înan de awe çin a zehmetî anceno û hetê pakîye de zî binê rîskî de ro. Recep Narînî wina qisey kerd: “Ez neweşa aye ra zî roj 12 hebî dermanan şixulnena. Seba aye zî rojê de 5 lître awe şimena. Nika semedoke awe çinîka ez nêeşkena tedavîyê xo zî rayra berî. Gerê ez rojê de 5 litre awe bişimî. Dewlete, qeymeqam, îdarekarî û muxtar kotîyê. Çîrê wayîrê ma nêvêcîyenê. Awa ma çin a, ma bîyê lêşin, tayê mendo ke aspijî bikûyê sarê ma. Kêyeyî dekerde firaqê. Ma kokimê. Ma 2 reyî şîme hetê qeymeqamî, tira va nê problemê ma çareser bikerêne. Hama zî çareser nêkenê. Her aşme ma ra heqê awê gênê la arizayan nivîrazenê. Ma ra vano şima dewijî virazêne. Ma veng danê dewlete wa nê problemê ma çareser bikerê.”
‘Ne dewlete ne zî muxtar karê xo keno’
Naime Omake zî seba çin bîyayena awe reaksîyon nîşan dana û wina vana: “Bî yew aşme ra zêdeyêro ke awa ma çinîya. Ma perîşan bîyê. Ne dewlete est a, ne zî muxtar. Ne dewlete karê xo kena nê zî muxtar. Dewlete ma ra pere gêna wena, alîkerî zî nêkena. Muxtar zî peranê xo yê muxtarîye weno la seba dewe xebate nêkeno. Ma endî perîşan bîyê. Ma ra vanê şima dewijî xo bi xo problemê awa xo çareser bikerê. Sarê kêyeyî 5 mîlyar pere bidêne û problemî çareser bikerê. Millet fêqîr o perê înan çinî yo ke debareyê xo bikerê. Ey anê barê dewlete zî kenê milê şarî. Ma naye qabul nêkenê.”
‘Gere bilez problemê awe çareser bibo’
Aycan Narîne zî vat ma nêeşkenê putanê xo buşîyê, nêeşkenê firaqanê xo buşîyê û wina domna, “Ma şinê awê pê peran gene. Awe çinîka ma nêeşkenê kincanê xo buşîyê ma nêeşkenê dilopêk awe bişîmê. Na dewe de ne dewlete ne zî muxtar karê xo keno. Gerê bilez no problem çareser bibo.”
