Silêmanî – Rojnameger Sûna Tûnç dîyar kerd ke vengê rojnamegeran Gulistane Tara û Hêro Bahadîn hîna gur beno û va ke her çend ke kiştox warê mîyanneteweyî de nêameyê muhakemekerdene zî, embazê înan bi qeleme û kamerayanê xo kerdişanê qirêjan eşkera kenê û dane muhakemekerdene.
23ê tebaxa 2024 de qezaya Seyîdsadiqî ya ke girêdayeyê şaristanê Silêmanî ya Başûrê Kurdîstanî de, wesayîta şîrketa Chatr Productionî hetê yew teyarayê bêmerdim û biçek (SÎHA) ya dewleta Tirkî ra ameye bombebarankerdene. Netîceyê nê hêrişê hewayî de rojnamegerî Gulistane Tara û Hêro Bahadîn cuya xo ra bîyî xo. Qetilkerdişê her di rojnamegeran pêroyî Kurdîstanî de û warê mîyanneteweyî de hetê sazgeh û rêxistinanê heqanê merdiman û çapemenî ra rastê reaksiyonanê huşkan ameyî. Gulistane Tara û Hêro Bahadîn serrgêra dîyine ya qetilkerdişê xo de yenê yadkerdene. Rojnamegere Sûna Tunç a ke Başûrê Kurdîstanî de rojnamegerîye kena, bi munasebetê serrgêra qetilkerdişê her di embazanê xo yê rojnamegeran de Ajansê Welatî rê qisey kerd.
‘Kiştoxî hîna zî nêameyê muhakemekerdene’
Rojnameger Sûna Tûnç ard ziwan ke zaf cayanê Kurdîstanî de rojnamegerê ke heqîqetî pawenê benê hedefê hêrişan û wina vat: “Di rojnamegerê cinî Gulistan Tara û Hêro Bahadîn netîceyê hêrişanê SÎHA de ameyî hedefgirewtene û şehîd bîyî. Dewa her di rojnamegeran warê mîyanneteweyî de hetê huqûqî ra sêni ke yêna waştene aver nêşîye û kesê ke înan hedef girewte hîna nêameyê muhakemekerdene. Labelê embazê înan na muhakemekerdene destê kesî de nêverdenê, bi qelema xo inan muhakeme kenê, bi kamera xo kerdişanê înan ê qirêjan ancenê û rastîye vejenê meydan. Ê ke vera DAIŞî de rastîye veta meydan û ê ke semedê Yewîya Neteweyî ya kurdan têkoşîn kenê û ê ke wazenê komelî haydar bikerê benê hedef û ê ke roşn ra tersenê wazenê bi tarîye bigîrê. Nê her di embazê ma mîrasêko pîl dima xo de verda. Embazê înan bêters, bi cesaretêko pîl wayîrê keda înan vejîyenê û semedê ke vîrardena înan manadar bikerê, xebatanê xo geş kenê.”
Êlih ra heta heqîqetî: Têkoşînê Gulîstan Tara
Sûna Tûnç vîra ard ke Gulistan Tara şaristanê Êlihî de mîyanê yew keyeyê 13 domanan de ameya dinya, keyeyê aye zaf ray rastê koçberîye ameyo û Êlih şaristan o ke tede qewimîyayîş ‘kiştoxê înan nedîyar’ zaf qewimîyayê û qiseykerdişê xo wina domna: “Gulistan bi xo bîye şahida nê hedîseyan. Beşdarbîyayîşê aye ya warê çapemenî semedê vetişê nê rastîyan bî. Cinîyêka cesûre, xobawer û xoperwerdekerdbî ke tarîtîye ra nêtersayene û her tim dima roşnaya rojî bîye. Hêzê ke na heqîqetî ra nêrehet bîyî waştî vengê heqîqetî bibirnê, labelê vengê aye hîna gur û hîna hira bîy. Waştiş û têkoşînê înan mîrasêko pîl awan kerd. Di rojî verê cû Başûrê Kurdîstanî de rojnamegerê cinîyî û akademîsyenî semedê yadkerdişê înan ameyî têhet û yew semîner de rolê cinîyan ya çapemenîye de munaqeşe kerd. No bi xo destkewteyêko pîl o û her tim nameyê înan yeno vîrardene û qet nêyeno vîra kerdene. Vengê Gulistan Tara û Hêro Bahadîn hîna gur beno.”
‘Ma do rayîrê înan de şêrê’
Sûna Tûnç bale ante serê prosesê Aştî û Komelê Demokratîkî ya ke vakurê Kurdîstanî û Tirkîya de yeno rayra berdene û dîyar kerd ke roşnkerdişê nê prosesî de keda bi seyan embazanê Gulistan û Hêro esta û nê çîyan ardî ziwan: “Rojnamegerê cinî hewl danê ke warê çapemenîye de vengê xo gur bikerê û vera çapemenîya serdest a camêrpereste de rastîye biresnê. Ma waştenê ke înan zî nê rojî bidîyayene. Her çend înan nêdîbê zî, embazê înan semedê ke no proses bi serkewte biqedîyo, şarê Kurdî heqanê xo bi dest bifîno û cinî û domanî bi azadî biciwîyê, çi ke destê înan ra yeno do bikerê. Helbet Gulistan zî waştêne ke rojêke herêma ke tede ameya dinya de rojnamegerî bikera û bi taybetî prosesê Vakurê Kurdîstanî teqîb bikera. Ma bawer kenê ke embazê înan koti de bê zî do serê şopa nê rojnamegeranê ke bedelê giranî dayê de rayra şêrê.”
