Îran de, Meclîsê Şorişê Cinîyan bi amancê bihêzkerdişê role cinîyan sîyaset de û vera vejîyayîşê cezayanê dardekerdişî de awankerdişê xo îlan kerd.
Meclîsê Şorişê Cinîyan ê Îranî, bi eşkerayîyêke awankerdişê xo îlan kerd.
Eşkerayîye de ame dîyarkerdene ke ewro Meclîsê Şorişê Cinîyan ke hûmarêka cinîyanê aktîvîstan ê ke warê sîyasî, komelê sîvîl, medya, heqê cinyan û heqê merdiman de aktîf ê, awankerdena xo îlan kerd.
Ame dîyarkerdene ke amancê awankerdişê meclîsî, bihêzkerdişê îqtîdarê sîyasî yê cinîyan û rêxistinkerdişê hedrebîyayena înan ê xoser, bitesîr û çarenussazkerê ware pêroyî û sîyasî yê welatî de yo. Sewbîna pawitişê heqê cuye û vera vejîyayîşê cezayanê dardekerdişî amancê bînî ê nê Meclîsî yê.
Reyna eşkerayîye de ame dîyarkerdene ke panc cinî yê ke seba awankerdişê Meclîsê Şorişê Cinîyan bîyê pêşeng nameyê înan winayê: Semane Sewadî, Senam Dewletşahî, Mîna Xanî, Neîme Dostdar û Yasemîn Fehede.
Meclîsê Şorişê Cinîyan vat: “Ma sey torrêka demokratik, zafrengîn, şumûldar û femînîst kar kenê. Cinîyê Rojhelatê Kurdîstanî û Îranî bi desan serrî yo hetê verî yê şerî de vera îqtîdarê Îranî, cîyawaştîya cinsî û mêrdeperestîyî xoverdayîş kenê. La na babeta sereke ke waştişê beşdarîya raştîn û çarenussazker ê înan, caardişê îqtîdar û prosesê qerardayîşê sîyasî de hema zî nêvurîyayî.”
Peynîya eşkerayîye de ame dîyar kerdene ke hema cinî mîyanê caardişanê sîyasî, îttîfqan û ê prosesan de nênê hesibnayîş, tena sey sembolîk ê, ganî tewr tay %50 cinî merkeze qerardayîşî de bê.
