Meclîsê ÎSÎG’î eşkera kerd ke aşama temmuze de 214 karkerî cînayetanê karî de cuya xo vîndî kerd û bale ante kedê gedayan û xebata bêgarantîye ser o.
Goreyê raporê temmuza 2026î yê Meclîsê Weşîye û Ewleyîya Karî (îSÎG), aşma temmuze de tewr tay 214 karkerî cînayetanê karî de cuya xo ra bîyê. Mîyanê 7 aşmanê ewilan ê serra 2026î de, cinayetanê karî de, hûmara karkerê ke cuya xo ra bîyê resayê 1279.
Goreyê aşman cînayetanê karî; çile de 155, sibate de 129, adare de 150, nîsane de 190, gulane de 213, hezîrane de 228 û temmuze de 214 karkerî ke cuya xo vîndî kerdê, ameyê qeydkerdene.
Tewr zaf mergî warê înşat û zîretî de bîyê
Goreyê raporî aşma temmuze de, tewr zaf mergî warê înşat, zîret, neqlîyat û karanê keştî-derya de bîyê. Goreyê vilabîyayîşê sektorî, sanayî de 73, înşatî de 60, zîretî de 45 û xizmetî de 36 karkerî cuya xo ra bîyê.
Mîyanê sebebanê mergê karkeran de; qezayê trafîk û servîsî, pelçiqîyayîş û cayo berz ra kewtiş, krîzê qelbî yan zî mezgî ra gonîameyîşî, piroginayîşê ceyranî û şîdetî ra ameyî qeydkerdene.
Temmuze de 12 gedeyê karkerî merdê
Raporo ke bale ant mergê gedeyanê karkeran ser, dîyar kerd ke aşma temmuze de 12 gedeyê karkerî wextê gurîyayîşî de cuya xo vîndî kerdê; înan ra 4 gedeyî 14 serrî ra qijker bîyî, 8 gedeyî zê mabenê 15 û 17 serran de bîyî.
11 cinî, 14 karkerê koçberî merdê
Aşma temmuze de tewr tay 11 karkerê cinî zî wextê gurîyayîşî de cuya xo ra bîyî û sewbîna 14 karkerê koçberî cuya xo vindî kerdê; înan ra 6 cinî Sûrîye ra, 2 Afganîstan ra, 1 Îran ra û 1 zî Ukrayna ra bî. Meclîsa ÎSİG’î dîyar kerd ke problemêko muhîm ê karkeranê koçberan, şertanê bêewle û bêgarantî de gureyayene.
Karkerê ke merdê %97ê înan bê sendîkayê
Goreyê raporî aşma temmuze, 214 karkerî qezayanê karî de cuya xo ra bîyî, înan ra tena 7 kesî endamê sendîka bîyî û 207 kesî bê sendîka xebitîyayê..
