Bîlançoyê erdlerzê rojawanê Kolombîya yo ke roja dişeme qewimîya, neticeyê ey çiqa şino giran beno. Ame eşkera kerdene ke semedê erdlerzê bi gîrdîya 7,4 de 132 kesî merdî û 570 kesî zî birîndar bîyî.
Goreyê eşkerakerdişê peyênan ê hukmatê Kolombîya, semedê erdlerzê bi girdîya 7,4 yê rojawanê Kolombîya de 132 kesî merdî û 570 kesî ra zafêrî zî birîndar bîyî. Servîsê Jeolojî yê Kolombîya eşkera kerd ke erdlerz bi wextê herêmî saete 09:34 de, nêzdîyê San Jose del Palmar ê herêma Chocoyî de, 96 kîlometreyî binê erdî de qewimîya yo.
Goreyê raporê verên ê hukmatî ra, pêroyî welatî de erdlerzî tesîrêko giran serê 32 şaristanan de kerdo. Ame eşkera kerdene ke Pereira de 60, Cali de 15, Quibdó de 8 û Manizales de zî 4 kesî merdî.
Pêroyî de 86 awanî rijîyayê. şaristananê Pereira û Cali de vera qewimîyayîşê talanî qedexeyê tebervejîyayîşî ame îlankerdene û tayê herêman de Leşkerî ameyê cakerdene.
Serekdewlet o rastgîr Abelardo de la Espriella yo ke Serekê DYE Donald Trumpî ra destek gêno, badê erdlerzî pêroyî welatî de rewşa afetî îlan kerd. Badê erdlerzî hetkarîya mîyanneteweyî kewte rojev.
Rayberîya Dewletanê Yewbîyayan ê Amerîka dîyar kerd ke seba stargeh, werd û tedbîranê ewleyî do 15,5 mîlyon dolarî hetkarî bikerê.
