Eyaletê Kolumbîyaya Brîtanya yo ke rojawanê Kanada de yo, semedê şewatê daristanî yo gird ke zaf leze vila beno, zêdeyî 20 hezar kesî ameyê texliye kerdene.
Rayedaran eyalet de rewşa awarte îlan kerd. Şewato ke bi tesîrê hewayî leze vila bi, seba şarê ke gelî de ciwîyenê bîyo sebebê endîşeyî. Ame eşkerakerdene ke Bald Range de ke nêzdîyê Gola Okanaganî de yo, herêmêka ke 10 hezar hektarî ra girdêrî semedê adirî ra bîyo wele. Serekwezîrê Kolûmbîyaya Brîtanya David Eby ard ziwan ke şewatî zerar dayo zaf mal û milkan, zaf merdimî zî seba ke şewatî nîşka ra hetê xo vurna, herême de asê mendî.
Ame dîyar kerdene ke merdimê herêma îzole de mendêne bi helîkopteran ameyî texlîye kerdene. Goreyê CTV Newsî ra, verê vilabîyayîşê şewatî herêma Faulderî ra zêdeyê 50 kesî bi rayîrê hewayî ameyî texlîye kerdene. Herême de vera na hedîseya cîdî de rewşa awarte ame îlan kerdene.
Kanada ke wayîrê çarina ra yew daristananê vakurê dinya ya, seba ke bieşkê şewate bitefnê îmkanê merdim û ekîpmanan bes nîyê, naye ra giranîya xo dana pawitişê herêmanê ke merdimî tede manenê.
