Komîsyonê Girewteyan ê Şubeyê ÎHD’yî yê Îstenbolî bale ante rewşa girewteyo nêweş Hamdullah Aydemîrî ser û dîyar kerd ke rixmê raporê sera 92 yê astengdarîye zî Hamdullah Aydemîr nêno veredayene û vat: “Hamdullah Aydemîr astê 4. yê nêweşîyê kanserî de yo. Ganî lazebez bêro veredayene.”
Komîsyonê Girewteyan ê Şubeyê Komeleya Heqanê Merdiman (ÎHD) yê Îstenbolî çalakîyê “Roniştişê F’yî” yê hewteyo 750. de ke di hewteyan ra reyke yena viraştene, vernîya awahîyê komeleya xo ya qezaya Beyoglu de viraşt. Aktîvîstê heqê merdiman, keyeyê girewteyan û temsîlkarê rêxistinê sîyasî û sîvîlî tewrê çalakîye bîyî. Avûkatê heqê merdiman, çalakîyê nê hewteyî de bale ante rewşa girewteyo nêweş Hamdullah Aydemîrî o ke Hepîsxaneyê Tîpê T’yî yê Ercîşî de yeno girewtene, ser o. Çalakîye de pankartê “Dermankerdiş heq oî nêno astegkerdene” û “Wa girewteyo nêweş Hamdullah Aydemîr bêro veredayene” ameyê akerdene û fotografê girewteyanê sîyaysî ameyê berzkerdene. Tekstê eşkerayîye Hemsereka Pêroyî ya ÎHD’yî Oya Ersoye wend.
Oya Ersoye, çalakîya hewteyo 750. de bale ante rewşa girewteyo nêweş Hamdullah Aydemîrî ser ke sera 92 astengdar o û wina vat: “Hamdullah Aydemîr nêweşê kanserî yo û her ke şino rewşa ey giran bena. Rixmê ke cezaya ey qedîyanêno veradayene. Hamdullah Aydemîr serra 2015î ra nat girewteyo. Goreyê agahîyê ke keyeyê ey dayê, verê ke Hamdullah bêro girewtene tu nêweşîyêka ey ya girane çinbî. Badê serra 2019î nêweşîyê ey de peyda bîyî; la o wext ey nêberdo nêweşxane. Heta ke Hamdullah Aydemîrî benê nêweşxaneyî kaserê ey ameybi asta 4. Serra 2024î de amelîyat bi la rewşa ey hema zî baş nêbena. Badê ke rewşa ey giran bena nîsana 2025î de yeno veredayene û dest bi tedawî keno la 2026î de reyna yeno girewtene. Birayê ey vat ke ‘ê şîyî zîyaretê birayê xo û dîyî ke rewşa ey baş nîya’. Waştişê keyeyê ey û ê ma bi hawayêko lazebez Hamdullah Aydemîr bêro veredayene.”
Badê eşkerayîye çalakî qedîya.
