Endama Konseya Serekîye ya Pêroyî ya KCK’yî Sozdar Avesta şehîdê fermanî yad kerdî û vat: “Têkoşînê komelê êzidî têkoşînê estbîyayîşî yo, têkoşînê merdimîye yo, têkoşînê xo newe ra pêardiş û newe ra înşakerdişî yo.”
Endama Konseya Serekî ya Pêroyî ya KCK’yî Sozdar Avesta bi wesîleya serrgêra Qirkerdişê Êzidîyan ê 3yê tebaxe ANF’yî rê erjnayîşî kerdî.
Sozdar Avesta ard ziwan ke komelê êzidîyan rixmê heme hêrişan bi tesîrê Têgêrayîşê Azadîye û Rayber Apoyî payra mend û nê vatî: “Nê prosesî de komelî tersê koletîye xo dima verda, îrade û rêxistinîya xo xurtêr kerd. Seba ke mabênê serranê 2003-2014î de Şingal mabênê Iraq û Îdareyê Herêma Kurdîstanî de bêstatuyî ame verdayene, zemînê xurtbîyayîşî yê awanîyanê sey DAÎŞî ame hazirkerdene. Xora Pêkerdişê 9ê Teşrîna Verêne ke 2020 de ame îmzakerdene o zî sey dewamê fermanî yo. Hema zî aqibetê 2 hezar û 800 êzidîyan nîno zanayene. Xeylê mezelî hema nêameyî akerdene û hêrişî bi metodanê cîya cîyayan dewam kenê. Vera ney xeylê welatan qewimîyayîşê Şingal sey qirkerdişî nas kerdî. No zî seba temînatê statuyê komelê êzidîyan muhîm o.”
Avesta veng da hukmatê Îraqî û Îdareyê Herêma Kurdîstanî ke wa nasname, bawerî û tewirê cuye yê êzidîyan qanûnê bingeyî de bêrê pawitene.
Sozdar Avesta îfade kerd ke Vengdayîşê Aştî û Komelê Demokratîkî yê Rayber Apoyî yê 27ê sibate Şingal de verê dewrêkê neweyî akerd û nê vatî: “Badê nê vengdayîşî xebatê yewîya komelî, rêxistinîya cinîyan û dezgehbîyayîşê demokratîkî bilezî zêdîyayî. Şingal de şar bi rayîrê meclîsanê xo, xo îdare keno. Munaqeşeyê derheqê YBŞ, YJŞ û dezgehanê herêmî yê bînan de yenê kerdene, gerek mîyanê Iraqî de bi rayîrê dîyalogî bêrê çareserkerdene. Komelê êzidîyan qet dewletêke rê tehdît nîyo. Bi hêzanê xopawitişî têna yeno waştene ke verê qirkerdişanê bînan bêro girewtene. Nê 12 serranê peyênan de ke bedelê girdî ameyî dayene, mabênê eşîran û keyeyan de paştdayîşî bîyo xurt, têkîlîya bi ereban, tirkmenan, kakailan û komelanê bînan ameye averberdene.”
Sozdar Avesta îfade kerd ke cinîyan pawitişî ra heta dîplomasî her warî de rolo serkêş girewto xo ser û wina vat: “Merkezê bedilnayîşê Şingalî de cinî û ciwanî est ê. Komelê êzidîyan dejo ke ant, açara xoverdayîşî. Agêrayîşê Şingalî û newe ra rêxistinbîyayîşê komelî vera fermanî cewabo tewr pîl o. Şingal ewro têna cayêkê roniştişî nîyo, seba êzidîyan ê dinya merkezê newe ra înşa û bedilnayîşî yo. Gerek hukmatê Iraqî û Îdareyê Herêma Kurdîstanî destkewteyanê Şingalî ke êzidîyan fînayî dest, bîgirê binê temînatê huqûqî. Şarê ma ke teberê welatî de yo wa têna serrgêra 3ê tebaxe de nê tim Şingalî vîrê xo de tepişo û paştî bido têkoşînê komelê êzidîyan. Têgêrayîşê Azadîye sey tim do ewroyî ra tepîya zî paştî bido komelê êzidîyan.”
