Merkezê Heqanê Merdiman ê Îranî eşkera kerd ke dewlete 16 rojan de 58 girewteyî darde kerdî.
Merkezê Heqanê Merdiman ê Îranî (IHRS) bultenê xo yê hewteyî weşana ke tede binpaykerdişê heqanê merdiman ê 23-30ê temmuze cayê xo gênê. Goreyê raporê temmuza 2026î de tena 16 rojan de hepisxaneyanê cîya-cîyayan de tewr kêmî 58 mehkumî ameyî dardekerdiş. Vajîyeno ke seba ke caardişî bi fermî nêyenê resnayene, hûmara raştikêne hîna zî berz a.
Raporî de bale ame antene ser o ke Hepisxaneyçê Qêzêlhêsarî de rojeyê vêşanî yê 16 rojan ke 1.500 ra zêdeyêr girewteyî tewrê ci bîyî, badê pêdîyayîşê bi selahîyetdaran ame qedênayene: “Selahîyetdaran teahud kerd ke şeş mehkumê ke seba îdamî ameybî berdene hucre, do peyser bêrê koguşanê pêroyîyan û dosyayê mehkumanê ke cezaya îdamî girewta, do newe ra bêrê erjnayene. Mehkuman vat taloqkerdişê rojeyî girêdayeyê caardişê nê teahudan o; eke îdamî reyna dest pêbikerê, ê do rojeyê vêşanîye dewam bikerê.”
Raporî de ame vatene ke derheqê girewteyê sîyasî Îsa Çarî de cezaya îdamî ameya dayene û xemê cîdî yê derheqê resayîşê ci yê avûkatêko xoser û standardanê muhakemeya seypêye de dewam kenê. Sewbîna derheqê Ehed Şokohîanî de hîrê cezayê îdamî yê cîyayî ameyî dayene û Mehkemeya Berze ya Îranî cezaya îdamî ya Bînyamîn Naxdî tasdîq kerde.
Raporî de ame dîyarkerdene ke hêzanê Wezîrîya Îstîxbaratî 12 hemwelatîyê ereban ê sunî Abadan û Mahşehrî de destbend kerdî û berdî cayanê nezanayeyan. Sewbîna, mehkuma 62 serrî Neda Badaxş ke Zîndanê Dowlatabadî de tepişta ya, her çiqas problemê weşîye yê cîdî est bê zî nêresena xizmetanê weşîye.
ÎHRSyî venga Neteweyanê Yewbîyayeyan, hukmatan û dezgehanê heqanê merdiman ê mîyanneteweyîyan da ke dardekerdişê bilezabez bêrê vindarnayene, girewteyê sîyasî û protestokerdoxê ke bi cezaya dardekerdişî reyde rî bi rî yê, bêrê pawitiş, îdiayê îşkence û îtîrafê bi zorî bi hewayêko xoser bêrê cipersayene û resayîşê mehkuman ê xizmetanê weşîye bêro temînkerdene.
