Cezayîr de Meclîsê Şarî yê Neteweyî de Demê 10. yê Demê Qanûnviraştişî de Halîde Bufdeş, tarîxê welatî de bîye cinîya ewilin ke seba sereka parlamentoyî ameye weçînayîş.
Cezayîr de temsîlê cinîyan ê îdareyê dewlete de serranê peyênan de hîna zêde ameyêne munaqaşakerdiş, Meclîsê Şarî yê Neteweyî (APN) de reya ewilin a ke cinîyêk seba serekîya meclîsî ameye weçînayîş. Doktor Halîde Bufdeş, bi raydayîşî ke ame viraştene, tarîxê xoserîya welatî de sey sereka parlamentoyî ya ewiline ameye weçînayîş.
Halîde Bufdeş, roniştişê akerdişî yê Demê 10. yê Qanûnviraştişî de raydayîşê nimiteyî de bîye sereka parlamentoyî. Raydayîş, tesdîqkerdişê endaman ra pey çarçewaya proseduranê qanûnê bingeyênî de ame viraştene. Weçînayîşê serekîya parlamentoyî de, endama Cepheyê Xelesîyayîşî yê Neteweyî (FLN) ra Halide Bufdeş, Têgêrayîşê Komelê Aştî ra Emîn Alluş û Partîya Yewîya seba Kultur û Demokrasî ra Raşîd Hassanî bîyê endam. Goreyê netîceyanê fermîyan, Halîde Bufdeşî 302 reyî girewtî û weçînitişî de ser kewt, Emîn Alluşî 57 û Raşîd Hassanî zî 7 reyrî girewtî.
Temsîlîyetê cinîyan de tabloya nakoke
Ameyîşê Halîde Bufdeşî yê nê wezîfeyî ke hîyerarşîyê dewlete de cayo berz de bibo zî, goreyê temsîlîyetê sîyasî yê cinîyan averşîyayîşêko tarîxî bîyo, la tabloya ewroyîne de nakokîyêka pîle zî mojnena. Weçînayîşê peyênî de hûmara parlamenteranê cinîyan zaf kêm bîye û hûmara înan parlamentoyo 407 kursîyîn de tena 25 kursî yê. Na rewşe, ferqê mabênê wezîfedarkerdişê cinîyan ê goreyê astanê berz û temsîlîyetê weçînayîşî mojnenoa. Pawitoxê heqan kêmbîyayîşê temsîlîyetê cinîyan, wedaritişê kotaya cinîyan a qanûnê newe yê weçînayîşî reyde girêdanê. Bi vîyartişê sîstemê lîsteya akerde û temsîlê nîsbî, ame îfadekerdene ke namzedê cinî kulturê weçînayîşî yê tradîsyonel de derûdorêko hîna zehmet reyde rî bi rî manenê.
