Anqara – Verfeka DEM Partî Ayşegul Dogane bale ante ser averşîyayîşanê peyênan yê prosesê Aştî û Komelê Demokratîkî û vat: “Derheqê muhîmîya qonaxê prosesî de do Hemserekê Pêroyî yê DEM Partî Tulay Hatîmoğullari û Tuncer Bakirhan partîyanê sîyasîyan de dayîşûgirewtiş bikerê.”
Verfeka DEM Partî Ayşegul Dogane derheqê averşîyayîşê rojevî de merkezê pêroyî yê partîya xo de eşkerayîye dê. Ayşegul Dogane eşkerayîye de dîyar kerd ke zereyê hewteyî de prosesê Aştîye û Komelê Demokratîkî de averşîyayîşê muhîmî bîyî û wina vat: “Heyeta ma badê wextêko derg şîye Girawa Îmralîyî û birez Ocalanî reyde pêvînayîş viraşt.
Serekê Meclîsî Numan Kurtulmuşî zî serê prosesî de partîyanê sîyasîyan reyde pêvînayîş kerd û eşkerayîye dê. Birez Ocalanî rayvistiş û pêşnîyazê xo heyeta ma rê pêşkêş kerdî. Ame munaqeşekerdene ke verkarê qanûnê çarçewa birêz Ocalanî de ameyo parekerdene. La badê ke heyetê ma şîye girawe, vejîya meydan ke nê agahî rast nîyê. Xora Serekê Meclîsî Numan Kurtulmuşî zî dîyar kerd ke verkarê qanûnî çin o.”
‘Qanûn seba çareserîyan wayîrê muhîmîyêka heyatî yo’
Dewamê qiseykerdişê xo de Ayşegul Dogane ard ziwan ke qanûnê çarçewa do bibo destpêkê qonaxêko newe û wina vat: “Birez Ocalanî pêvînayîş de dîyar kerd ke o besteyê nê qerarî yo ke problem bi huqûqê way û brayîye çareser bibo. Birez Ocalan seba serkewtişê prosesî hewldananê xo domnêno. Qanûnê çarçewa do bibo startê verên û referansê qanûnanê ke do badê ra vejîyê. Sewbîna nezelalîya huqûqî zî do derbas bibo. Naye zî zaf muhîm û bimana ya. Meclîsî zî derheqê nê de îrade nîşan da û a zî biqîmet a. Ma her tim vanê ke cayê çareserîye parlamento ya. Qanûn seba çareserîyan wayîrê muhîmîyêka heyatî ya.”
‘Badê Komîsyonê Edaletî qanûn do bêro Heyetê Pêroyî yê Meclîsî’
Ayşegul Dogane ard ziwan ke pawîyeno tewr verê ke meclîs bikewo tehtîl, qanûnê çarçewa do bikewo rojev û wina domna: “Badê Komîsyonê Edaletî qanûn do bêro Meclîs. Rojanê verênan de zî do tewr zaf serê nê de bêro qiseykerdene. La heta nika wextêko dîyarkerde ma reyde nêame parekerdene. Sewbîna îdiayî estbî ke Serekê Meclîsî do Serekanê Grûba Partîyan de bêro têhet, la ma reyde agahîyêka wina nêameye parekerdene. Proses de qonaxê tarîxî bi ca ameyî. Qanûnê çarçewa zî nika ra dima do bibo nuqtaya bingeyîne ya prosesî. No qanûn nêeşkeno bi tena serê xo çareserî bîyaro. La eşkeno verê çareserîya demokratîke akero û prosesê Aştîye û Komela Demokratîkî hetê huqûqî ra garantî bikero.”
‘Qanûnê çarçewa eşkeno bibo nuqtaya verêne ya demokratîkbiyayîşî’
Erjnayîşê xo de Ayşegul Dogane da zanayene ke hewceyîya bingeyîne ya Tirkîya bihêzkerdişê demokrasî û huqûqî ya û wina qisey kerd: “Qanûnê çarçewa eşkeno bibo nuqtaya verêne ya demokratîkbiyayîşî û badê ra zî babeta sey demokrasîya herêmî û heqê azadîya fikran a. No proses eynî wext de prosesê caardişê raporê komîsyonî yo. Gerek meclîs zî nê bişopno. Verkar zaf yeno munaqeşekerdene. Vanê do senî bibo. La heta verkarêk çin bo serê ci de qiseykerdiş beno ke rind nêbo. Eke ma qalê agêrayîşê welatî bikerê ganî ma cesûrî bê û nê ra netersê û her kes zî derheqê nê de hîşyar bo. Ma her tim vanê ke şîdet ra vurîyayîşê sîyaseto demokratîke ganî bibo. Seba nê zî bêçekbîyayîş zaf muhîm o. Ganî meclîs zî nê îradeyî nîşan bido û gumanê ma zî nê ser de çin ê. Partîya ma zî do naye ser hewldanê xo bidomno.”
Hemsereka Pêroyî yê DEM Partî do partîyanê sîyasîyan zîyaret bikerê
Ayşegul Dogane da zanayene ke Hemserekê înan ê pêroyî do zereyê hewteyî de partîyanê sîyasîyan zîyaret bikerê û wina dewam kerd: “Serê qonaxê prosesî û hewceyîyanê prosesî de hemserekê ma do partîyanê sîyasîyan reyde de dayîşûgirewtiş bikerê. Seba aştîya komelî, qanûnê çarçewa do senî bêro caardene û ganî çi bêro kerdene do partîyanê sîyasîyan reyde qisey bikerê. Ganî seba aştî, têduştî û azadîye ma pêro pîya berpirsîyarîye bigîrê û wayîrê nê prosesî vejîyê.”
Ayşegul Dogane serê persa rojnamegeran a derheqê Partîya Newe ya Ozgur Ozelî de zî dîyar kerd ke partîya newe seba muxalefetê Tirkîya bi xêr bo û waşt ke partîya newîye ya ke hetê wekîlanê verênan ê CHP’yî ra ameya awankerdene, xizmetê haştî, demokrasî û têduştîya welatî bikero.”
