Gever de wesayîtê zirxin ê polîsan sûke de da gedayêk ro û aye birîndar kerd.
Qezaya Geverî ya Colemêrg de serê sibayî derûdorê saete 10:00î de wesayîtê zirxin ê polîsan ke bi leze şîyêne, rayîrê 23ê nîsane yê sûke ser o da kêneka bi nameyê Elanûr Kina (17) ro û aye birîndar kerd. Ame zanayene ke seba virazîyayîşê peyarayîrî, kêneke û maya aye kişta rayîrî de rayra şînî û wesayîtê zirxîn o bi nameyê “Akrep”î da kêneke ro. Maya Elanûr Kina zî deqeya peyêne de pirodayîşê wesayîtî ra xo xelesna. Goreyê agahîyanê ke ameyê girewtene, lingê Elanûr Kina şikîyayê û rîyê pirodayîşî ra travmaya mezgî derbas kerda.
Goreyê şahîdanê hedîse, wesayît zaf bi lez û bêserûber şîyêne, o semed ra zî qeza qewimîyaya. Elanûr Kina ya ke birîndar bîya, badê mudaxaleyo ewilin, sewqê Nexweşxaneyê Dewlete yê Geverî ameya kerdene. Ame zanayene ke Elanûr Kina ameya amelîyatkerdene û rewşa aye nika baş a.
