Keyeyanê çar hemwelatijan serrgêra 10. de vengdayîşê edaletî kerd. Nê hemwelatijî 8ê teşrîna verêna 2016î de qezaya Gever yê Colemêrg de bi gulebaranê wesayîta zirxine ya polîsan ameyî kiştiş.
Qezaya Gever yê Colemêrg de 8ê teşrîna verêna 2016î de bi gulebaranê wesayîta zirxine ya polîsan Serhat Buldan (15), Necdet Işozu, Rahmî Safhali û Aydin Tumen cuya xo ra bîyî; Şemseddîn Kaya û Mehmet Alî Kaya zî birîndar bîyî. Derheqê polîs Îlyas Mekîklî de bi îdîaya “bi qest û zanayîş bîyo sebebê merg û birîndarbîyayîşê zaf kesan” dewa ameye akerdiş û seba ey 15 serrî cezaya hepsî ameye waştiş.
Dewa verê cû Dadgehê Cezaya Girane yê Gever de ameye akerdiş; dima bi bahaneyê “emnîyetî” ameye erşawitiş Dadgehê Cezaya Girane yê 3. yê Amedî. Polîs Îlyas Mekîklî roniştişê dîyine de ame veradayîş. Roniştişî qerarî ya 11ê teşrîna verêna 2018î de Mekîklî rê 11 serrî û 10 rojî ceza ameye birnayîş û waştişê tepiştişê ey zî hetê dadgehî ra ame redkerdiş. Keyeyanê kişteyan ajansê ma rê qisey kerd û dîyar kerd ke dosya 8 serran ra nat Dadgehê Berzî (Yargitay) de vindena. Înan edalet waşt.
‘Wa no hedîse bikewo rojeve’
Pîyê Serhat Buldanî (15) Hasan Buldanî dîyar kerd ke 10 serran ra nat edaletî pawenê: “Lajê mi semedê yew sebebî ame kiştiş û ma pêro zanenê ke no sebeb çi yo. 8 serran ra nat dosya Yargitay de vindena û hema netîceyêk nêvejîyayo. Badê cezaya polîsî ya 2018î dosya ameye bêvengkerdiş. A serre ra nat ne kes ano rojeve, ne zî netîceyêk vejîyeno. Ma wazenê ke sîyasetmedar û rayberê ma na dewa biyarê rojeve.”
‘Ez edaletî wazena’
Pîyê Aydin Tumenî Ubeyt Tumenî îfade kerd ke 10 serran ra nat tu netîce nêvejîyayo: “Polîso kiştox dadgeh de vat: ‘Şima rê yeno ke semedê kurdêkî mi rê ceza bidê?’ Mesele no yo. Lajê mi kişt, ma bî mexdur. Kiştişê lajê mi her çî ma ra girewt; ez edaletî wazena.” Keyeyanê Rahmî Safhali û Necdet Işozuyî zî eynî mesele ser o waştişê xo ard ziwan û vengdayîşê edaletî kerd.
