Festîvala Kultur û Xoza ya qezaya Çewlîgî Kanîreş ke 16 serran ra pey do 23-24ê temmuze de bêra viraştene, programê ci de qiseykerdişê sîyasetmedaran û panelan ra bige heta dîwanê dengbêjan, konserê hunermendan û vazdayîşê estoran, zaf çîyî est ê.
Qezaya Çewlîgî Kanîreş ke bi xozaya xo ya rindeke, rengînîya kulturî û hetê komel û bawerîyan ra sey cayêko kozmopolît yena nas kerdiş, dimayê serranê dergan xebatanê festîvale rê amadekarî kena. Festîvala Kultur û Xoza ya Kanîreşî ke 16 serran ra pey do 23-24ê temmuze de bêra viraştiş, programê ci de qiseykerdişê sîyasetmedaran û zaf panelan ra bige heta diwanê dengbêjan, konserê hunermendan û vazdayîşê estoran zaf çîyî est ê.
Proqramê festîvale de çiyî est ê?
Festîvale do 23ê temmuze de roja çarşeme saete 10:00 de dewa Toxlîyan de bi vazdayîşê estoran ke kulturê qeza de cayêko muhîm gêno, dest pêbikero. Eynî roje mabênê saetanê 15:00-17:00 de Tesîsê Maseyan de bi beşdarîya pisporan panelê ekolojî do bêro viraştene. Dimayê panelî do vengê dengbêjan bêro goştarîkerdiş. Dengbêjan ra dima zî teber ra mêmanê ke yenê, înan reyde çadirî do bêrê ronayîş û kamp do bêro kerdiş.
Roja diyîne de do bi temsîlkaranê partîyanê sîyasîyan û rîsipîyê şarî reyde ara kerdene û dima zî, çadirê xoverdayîşî yê ekolojî yê Gimgimî bêrê zîyaretkerdiş. Saete 17:00î de zî vernîya awanîya şaredarî de konserêko gird bêro dayîş.
Sîyasetmedar û hunermendî do bêrê pêser
Çarçewaya festîvale de Hemserekê Pêroyî yê DBP’yî Keskîn Bayindir û Wekîlê Çewlîgî yê DEM Partî Omer Faruk Hulaku do şarî reyde bêrê pêser. Festîval de sewbîna hunermendî Sîpan Xelat, Ciwan Adar, Halîl Bayindir, Eylul Nazlier û Ulaş Kelaşîn do sehne bigîrê û deyîranê xo vajê.
