33 raywanê ke Qirkerdişê Pirsûsî de cayêko tede amebî qetilkerdene, uca de ameyî vîrardiş. Qiseykerdişan de ame vatene ke têkoşîn û xeyalê înan mîrasê înan o.
Yadkerdişê serrgêra 11. ya Qirkerdişê Pirsûsî bi pêşengîya Keyeyanê Pirsûsî vernîya Merkezê Kulturî yê Amara yê qezaya Pirsûs a Riha de ame viraştene. YadkerdişÎ de birîndarê qirkerdişî, temsîlkarê SDGF’yî, ESP, Platformê Sazgehanê Demokratîkan, Wekîlê Serekê Grûba DEM Partî Sezaî Temellî û xeylê welatijî amade bîyê.
Yadkerdişî de fotografê 33 raywananê ke cuya xo ra bîbî, ameyê berzkerdene û seba yadkerdişê înan deqayêk rêze ameye girewtiş.
‘Raywanê xeyalan seba gedeyan kewtbî rayîr’
Hemserekê DEM Partî yê Riha Nîhat Demîrbîleklî yadkerdişî de qisey kerd û bale ant Şorişê Rojava ser o û wina vat: “33 raywanê ma yê xeyalan waşt ke şêrê Kobanî û gedeyan rê kaykilan û şekir berê. La rasterast bîyê hedefê qirkerdişî. O wext dayîkêk vatbi, ‘Werrekna cayê înan de ma bimerdêne, ma musayeyê dejî yê la înan dej nêdibi.’ No vatiş bi xo nîşaneyê way û birayîya şaran o. Ma do têkoşîn û xeyalanê înan bîyarê ca.”
‘Berpirsîyarê qirkerdişî dewlet a’
Nameyê SGDF’yî ser o Asli Demîr dîyar kerd ke 11 serrî ra ver seba awankerdişê Kobanî kewtî rayîr û wina vat: “Raywanîya înan seba way û birayîya şaranê kurd û Tirkîya bîye. Berpirsîyarî nê qirkerdişî dewlet a ke vernîya teqayîşê bombayan nêgirewt. Kiştoxî hîna nêameyê muhakemekerdene. Ewro şahidê Pirsûsî, serrgêra qirkerdişî zindanan de pêşwazî kenê. Ma do şehîdanê xo çi zîndanan de çi zî teber de bîyarê ziwan.”
‘Ma do mîrasê înan bipawê’
Ferhat Demîrî zî nameyê Platformê Kede û Demokrasî yê Riha ser o qisey kerd û vat ke badê serran zî dejê înan newe yo û dîyar kerd ke do mîrasê 33 raywananê xeyalan bipawê. Emdamê MYK’yî yê ESP’yî Okan Daraciyî da zanayene ke ey waştişê aştîyêka adîlane, seypê û demokratîke kenê û wina vat: “Nê baxçeyî de xeyalê ma nimite yê. Waştişê şaran ê seba azadî û aştî qetil kerdî. La ma bin nêkewtî. Aştîyêka ke teslîmîyetî ser o bêra ferzkerdiş ma qebul nêkenê.”
Gazîyê Qirkerdişê Pirsûsî Efe Çatalbaşi zî dîyar kerd ke ê her çar parçeyê Kurdîstan û Tirkîya ra ameybî tîya û berpirsê nê qirkerdişî ê kesê ke vatêne Kobanî kewt û do bikewo.’
‘Ma do têkoşînî berz bikerê’
Wekîlê Serekê Grûba DEM Partî Sezaî Temellîyî zî dîyar kerd ke Kobanî hêvîya şaran bîye û wina vat: “Hêzanê tarî û barbarî embazê ma tîya de qetil kerdî. Raya înan raya demokrasî, sosyalîzm û komara demokratîk a. Seba caardişê xeyalanê 33 raywananê xeyalan ma do têkoşînê xo hîna zêde berz bikerê.”
Badê eşkerayî, bi sloganê ‘Biciwîyo way û birayîya şaran’ û ‘Seba Pirsûsî edalet, seba her kesî edalet’ cayê qirkerdişî de qerenfilî ameyî ronayene. Dima ra zîyaretê goristanê 33 raywananê xeyalan ame kerdene.
‘Têkoşînê înan têkoşînê ma yo’
Serê goristanî de merdima Osman Çîçek o ke qirkerdiş de cuya xo ra bîbî, Hanim Çîçek e qisey kerd û nê mesajî da: “Ma ê xo vîr ra nêkerdê, têkoşînê înan têkoşînê ma yo.”
Yadkerdiş bi sloganan qedîya.
