Netîcenameyê Konferansê ‘Jenosîd û Entegrasyonê Demokratîkî yê Şengalî’ yo ke vizêr ame viraştene, raya pêroyî reyde ame parekerdene.
Netîcename de ameyo vatene ke ewil dewleta Îraqî û ganî pêro dewletî jenosîdî nas bikerê û qanûnê jenosîdî bîyarê ca. Vizêr Newala Kersî ya Koyê Şengalî de hetê Akademîya Zanistanê Komelkî ya Abdullah Ocalanî ra bi munasebetê serrgêra 12. ê fermanî, bi sloganê ‘Edaletê Vîyartîşî do bibo Bingeyê Entegrasyonê Demokratîkî’ bi tewrbîyayîşê 200 kesan yew konferans ame viraştene. Konferansî de derheqê rewşa komelê Êzîdîyan de 3 panelê taybetî ameyî organîzekerdiş. Ewro zî netîcenameyê konferansî raya pêroyî reyde ame parekerdiş.
Netîcenameyo ke hetê Akademîya Zanistanê Komelkî ya Abdullah Ocalanî ya Şengalî ra ame eşkerakerdene, wina yo:
“Ma sey şarê êzîdî bi hezaran serran o rastê qirkerdiş û fermanan yenê. Heta nika zî hêrişî ma ser o nêkêmîyayê. Nê hêrişan cografyaya ma parçe-parçe kerd, ma welatê ma ra dûrî kerdê. Hûmarêka nedîyar şehîd û vîndîbîyayeyî ma bîyî. Waşt ke ziwanê ma çin bikerê, bawerîya ma bişikinê. Bi hezaran serran o kultur û nasnameyê ma ser o hêrişî est ê. Nê hêrişî binê xeylê maneyanê cîyayan de bîyî. Tayênan waşt ma bikerê eskerê xo, tayênan waşt dewan û koyanê ma, ma ra bigîrê û tayênan zî waşt bawerîya ma bivurnê. La eslê xo de amancê her yew hêrişî çinkerdişê estbîyayîşê ma bi.
Tewr peynî 3yê tebaxa 2014î de fermano ke ame ma ser, pêro fermananê bînan ra cîya bi. Vernîya çimanê pêro dinya de, bi îxanet û hemkarîya zafê dewletan û hetan hêrişêko tewr hov bi ke tarîx de nêameyo vînayîş. Pêro firazî, komel û welatê ma kewt verê nê hêrişî. Bi hezaran doman û cinîyî ameyî remnayene, bi hezaran merdimî ameyî qetilkerdiş û bi se hezaran merdimê ma koçber bîyî. Cinîyî û domanî bazaran de ameyî rotiş. Hema zî bi hezaran şehîdê ma goranê komîyan de yê. Teslîmkerdişê esteyanê ma, ma rê kenê sey îşkenceyî. Ser ra 12 serrî derbas bîyî la hema zî cenazayê ma erd de yê. Bi se hezaran merdimê ma hema zî kampan de û welatanê cîyayan de yê, nêşênê agêrê welatê xo. Hema zî xirbeyê keyanê ma erd de yê. Yew sucdar zî nêameyo cezakerdene. Eksê ci, nê kesî hema zî sey tehdîdêk dormeyê ma de ameyî cakerdene. Şengal hema zî bêstatu yo.
Domanê Şengalî yê ke wazenê şarê xo bipawê, zaf hetan ra rastê hêrişan yenê. No konferanso ewroyî yo ke pêro hetanê êzîdîyan ê zereyê welatî û teberê welatî, dostanê xo yê Îraqî ra bigîrê heta Ewropa û welatan mojna ke, îradeyêko êzîdîyan û dostanê xo nayo ro, îradeyê çareserî yo. reyna bi rayîrê nê konferansî ma wazenîme ke seba dermanbîyayîşê birînanê ma pêro hetê eleqedarî wezîfeyê xo bîyarê ca. Sere de dewleta Îraqî û pêro dewletî jenosîdî nas bikerê û qanûnê jenosîdî bîyarê ca. Îrade, nasname û bawerîya ma qebul bikerê ke ma ewro wazenîme bi entegrasyonê demokratîkî heqê xo garantî bikerî. Senî ke no komel dewleta Îraqî sey dewleta xo vîneno, ganî dewleta Îraqî zî nê şarî bêcîyayî sey temsîlîyêtê xo yê esasî bivîno.
Reyna nê konferansî de seba vera bîyayîşê qatlîamanê neweyan, muhîmîya yewbîyayîş û dezgehbîyayîşê şarê êzîdîyan ameya munaqeşekerdiş û seba demê ameyoxî qerarê muhîmî ameyê girewtiş. Bi taybetî seba caardîşê qanûnê jenosîdî zereyê welatî û teberê welatî de qerarê pîlkerdişê têkoşîn û dezgehbîyayîşî ameyê girewtiş. Reyna bi destegê dost û embazanê xo, seba entegrasyonêko demokratîk o ke sey projeyê çareserîya Rojhelatê Miyanênî yo ke hetê Serek Apo ra ameyo pêşkêşkerdene û komelê êzîdîyan zî eşkeno estbîyayîş, kultur û bawerîya xo bipawo, pêro hetan de ameyo munaqeşekerdiş û qerarê falîyetî ameyo girewtiş. Komelê êzîdîyan, goreyê qanûnanê ke mîyanê înan de zemînê çareserî est o, mekanîzmayî bêrê ronayene ke bieşko xerîteya entegrasyonê demokratîkî bîyaro meydan, sîyaseto ke helneno ney, entegrasyono demokratîk ke mîyanê xo de hewêneno.
Nê esasî ser o konferans de zaf qerarê muhîmî ameyê girewtene ke nê wextî ra dima xebatî bêrê kerdene û komelê Êzîdîyan babeta qedera xo bi xo dîyar bikero;
- No konferans sey konferanso ewilin ê jenosîdî bêro qebulkerdiş û serranê ameyoxan de dewam bikero
- Seba ke jenosîd bêro naskerdene, dezgehêk seba nê karî bêro ronayene
- Seba arşîvê fermanî yo ke nika destê şarê êzîdî de nîyo, xebat bêra rayberdene û arşîv bêro arêdayene
- Seba ke şopê fermanî nêyerê vîrrakerdene, Şengalo kehen sey muzexane bêro amadekerdene
- Seba newera ronayîşê Şengalî, pêro hetanê eleqedaran reyde têkîlî bêra ronayîş.
- Seba garantîkerdişê heqanê şarê êzîdî û caardîşê entegrasyonêkê demokratîkî xebatî bêrê xurtkerdiş
- Seba naskerdişê jenosîdî pêro hetan reyde xebatî bêrê rayberdene.”
