Mexduranê KHK’yî ra Alî Karadoganî diyar kerd ke prosesê Aştî û Komelê Demokratîkî semedê çareserkerdişê probleman firsendêk o û wina vat: “Heta problemê komelkî çareser nêbê, problemê şexsî zî çareser nêbenê.”
Rzxistinê kede û demokrasî, do semedê merdimanê ke bi qerarnameyî KHK’yî wezîfe ra ameyî dûrvistiş, bi sloganê “Ma karê xo wazenê” 17ê temmuze de vernîya Wezaretê Edaletî de eşkerayî bidê û dima zî dest bi çalakîya nobeta 24 saetan bikerê. Mexdurê KHK’yî yê ke şaristanê vakurê Kurdîstanî û Tirkîya ra yê, do tewrê çalakî bibê. Alî Karadogan o ke mamostayîya ziwan û edebîyatê Tirkî kerdêne, serra 2016î de bi qerarê KHK’yî wezîfeyê xo ra amebî dûrvistiş, badê erdlerzê Mereşî, Semsûr ra bar kerd şi Êlih. Mexdurê KHK’yî û erdlerzî Alî Karadogan derheqê çalakî û amancê çalakî de qisey kerd.
‘Semedo ke ma heqdar ê, ma xover da’
Alî Karadoganî vat ke ê wazenê bi na çalakî vengê xo biresnê berpirsîyaran û wina qisey kerd: “Îqtîdarî derbe semedê zêdekerdişê tedayan yê serê hêzanê demokrasî sey firsendêk dîye. Serê nê kerdişan ra 10 serrî vîyartî labelê se ra 80yê embazanê ma hema zî nêagêrayî karê xo. Înan ra yew zî ez a. Ma zî semedê heqanê xo biwazê do çalakî virazê û vengê xo vejê. Ê ke bi KHK’yî wezîfe ra ameyê dûrvistiş û ê ke wazenê paştî bidê, do tewrê na çalakî bibê. Ma do badê eşkerayî dest bi çalakîya nobeta 24 saetan bikerê. Ma wazenê na bêedaletîye û bêhuqûqîye bimojnê. Ma sucdar nîyê, aye ra zî ma her tim xover da. Ma tu wext dest xebatanê xo ra fekvera nêda.”
‘Sebebê probleman çinbîyayîşê demokrasî yo’
Alî Karadoganî dewamê qiseykerdişê xo de dîyar kerd ke o bi manayê awankerdişê KURDÎ-DER’î wezîfe ra ameyo dûrvistiş û wina dewam kerd: “Prosesê Aştî û Komelê Demokratîkî eşkeno problemanê ke ma ciwîyenê, înan çareser bikero. No proses, her çend ke bi hawayo ke ma wazenê nêşiro zî, zaf muhîm o. Eke no welat demokratîk bibo, heqê mamosteyan, karkeran, citkaran, domanan û cinîyan zî do bêrê dayeîş. Sebake ez zî awankaranê KURDÎ-DER’î ra yew bîya, ez wezîfe ra ameya dûrvistişe. Labelê ma KURDÎ-DER goreyê qanûnanê Tirkîya awan kerd. Ganî her kes bi ziwan û nasnameyê xo weşîya xo biramo. Semedê ney zî eke no proses bi hawayêko serkewte biqedîyo, zafê problemê ma do çareser bibê. Sebebê problemanê ke ma ciwîyenê çinbîyayîşê demokrasî yo. Heta problemê komelî çareser nêbê, problemê şexsî zî çareser nêbenê.”
‘Ganî pêro hêzê demokratîkî paştî bidê’
Alî Karadoganî peynîya qiseykerdişê xo de waşt ke her kes tewrê çalakîya înan bibo û wina dewam kerd: “Ê ke nê sîstemî ra razî nîyê, ganî bizanê ke no problem yê ma pêrûnan o. Ma nêeşkenê reyêk de pêro probleman çareser bikerê labelê ma do game bi game semedê çareserî bixebitê. Ma çareserîya problemanê pêro merdiman wazenê. Semedê ney bêrê ma pîya probleman çareser bikerê. Wa pêro sazgeh, rêxistin, partîyê sîyasî û hêzê demokratîkî tewrê çalakîya ma bê û paştî bidê.”
