Amed – Hemserekê Şubeyê Odaya Mîmaran a Amedî Şerefxan Aydinî, bale ante serê xebatanê vurnayîşê Zindanê Amedî yê seba muzexaneyî û dîyar kerd ke binê nameyê modernbîyene de vîrê komêlî û şopê zulm û xoverdayîşê tarîxî ameyê wedaritene û awanî sey ‘otelêka panc estareyan’ ameya dîzaynkerdene.
Xebatê vurnayîşê Zindanê Amedî yê ke bi nameyê Hûmara 5. ya ke serranê 1980yî de bi îşkenceyanê giranan û xoverdayîşê tarîxî şinasîyena, ver bi peynî şinê. Projeya vurnayene ya ke aşma hezîrana 2023î de kewta pratîk, şopê zulmê dewleta tirke û xoverdayoxanê endamanê Têkoşînê Azadîya Kurdîstanî roj bi roj yenê vîndî kerdene. Hemserekê Şubeyê Odaya Mîmaran a Amedî Şerefxan Aydinî derheqê projeya newekerdene û muzekerdişê zindanî, ser o ajansê ma qisey kerd.
‘Awanîyêka sey otela panc estareyan viraşta’
Şerefxan Aydinî sereyê qiseykerdişê xo de da zanayene ke inan seba pawitişê rastîya zindanî bi pêro sazgehanê sivîlan ê Amedî reyde mîyanê koordînasyonî de hereket kerdo û Koordînasyonê Zindanî ronayo û wina vat: “Ma seba ke zindan nêbedilîyo zaf çalakî, rayraşîyayîş û kampanyayî viraştî. La çi heyf ke vejîya meydan pêro nêrazîbîyayîş û waştişê ma yê seba hîşyarîya komelî, bi ca nêameyî. Vîrêko newe û modern awan kerdo. Çike ma dîmenanê peyênan ra vînenî, înan pêro rastîyê ke qewimîyayê, vurnayê. Awanîyêka zaf moderne, awahîyêka sey otela panc estareyan viraşta.”
‘Rastîya ke bi desan serran amebî pawitene meydan ra wedarnayê’
Dewamê qiseykerdişê xo de Şerefxan Aydinî dîyar kerd ke Zindana Amedî cayêko wina yo ke tede heqê merdiman ameyê binpaykerdene û nê çîyî vatî: “Lazim bi ke na rastîya muzeye de biameyêne mojnayene. Yêno zanayene ke nêzdî de na muzexane do bêra akerdene. Ameyene pawene ke tîya de cayê binpaykerdişê heqanê merdiman bêro nîşandayene, la çi heyf ke no çî nêbî. Rastîya ke bi desan serran amebî pawitene, nika ameya vurnayene. Rastîya zindanî meydan ra ameya wedaritene.”
‘Ganî neslê neweyî nê rastîyan ra bêxeber nêmanê’
Pêynîya qiseykerdişê xo de Şerefxan Aydin veng da rayedaran û wina vat: “Serrgêra 14ê temmuze de vejîyayîşê na rastîye, babetêka xemgînî ya û çi heyf ke no vîrê tarîxî nêameyo pawitene. Goreyê zanayîşanê ma û agahîyanê ke ma girewtê, nêzdî de na muzexane do bêra akerdene. Ganî ma nê xoverdayîşê tarîxî û vîrê tarîxî yo ke tîya esto, bi rayanê cîyayan bipawê ke neslê ameyoxî, neslê neweyî nê rastîyan ra bêxeber nêmanê.”
