11ê temmuza 2025î de yew grûba gerîlayan Silêmanîye de çekê xo veşnayî. Adîl Kiliç o ke lajê ey Ethem Kiliç zî mîyanê a grûbe de ca girewtêne, dîyar kerd ke amancê gerîlayan o bi ke dewlete rê gamanê qanûnîyan bidê eştiş û îfade kerd ke Rayberê Şarê Kurdî Abdullah Ocalanî Kurdî dardekerdişî ra ardê masaya muzakereyî ser o.
Prosesê ‘Aştî û Komelê Demokratîkî’ yo ke 27ê sibata 2025îde bi vengdayîşê Rayberê Şarê Kurdî Abdullah Ocalanî dest pêkerdbi, serre û nêm xo pey de verda. Badê nê vengdayîşî, PKK’yî 1ê adara 2025î de bi eşkerayîyêka nuştekî pare kerd ke înan adirbest îlan kerdo. Dima, 5-7ê gulana 2025î de PKK’yî Kongreya xo ya 12. organîze kerd û 12ê gulane de zî qerarê xofesîhkerdişî girewt. Dima ra zî 9ê temmuza 2025î de, dimayê 26 serran dîmenê Rayberê Şarê Kurdî Abdullah Ocalanî televîzyon de ame weşanayene. Badê ney, Têgêrayîşê Azadîye yê Kurdî 11ê temuuze de bi merasîmêk eşkefta Casena ya şaristanê Silêmanîye yê Herêma Federal a Kurdîstanî de bi 30 endamanê xo çekê xo veşnayî. Sîyasetmedar, rojnameger, akademîsyen, Dayîkê Aştî û xeylê kesî ke herêmanê cîya-cîya yê Kurdîstan, Tirkîya û dinya ra ameybî, beşdarê merasîmî bîyê. Gerîlayê Têgêrayîşê Azadîye yê Kurdî 26ê teşrîna peyêne ya 2025î de zî hêzê xo yê ke vakur û Tirkîya de mendbî, peyser antî. Rixmo ke Têgêrayîşê Azadîye yê Kurdî û Rayberê Şarê Kurdî Abdullah Ocalanî xeylê gamî eştî zî, dewlete ra qet yew gama şênber nêameye eştene û tena Komîsyonê Meclîsî ame awankerdiş.
Pîyê gerîla Ethem Kiliçî (Serdar Bawer), Adîl Kiliç o ke lajê ey zî mîyanê grûba gerîlayan a merasîmê veşnayîşê çekan de ca girewtbi, derheqê sergêra veşnayîşê çekan de seba ajansê ma qisey kerd.
Adîl Kiliçî veşnayîşê çekan ê Têgêrayîşê Azadîye yê Kurdî ard vîr û wina vat: “Nêzdîyê nêm seserreyî yo na rêxistine ameya awankerdiş û kokê xo de tu wext poşmanîye qebul nêkerda. Çekî ameyî veşnayîş zî, ziwanê înan o tûj ê vera kurdan û Têgêrayîşê Kurdî hema zî nêvurîyayo. Sewbîna waştbi ke do tayê qanûnî bêrê vurîyayîşe, seba ma hêvîyêka pîle virazîyaye labelê çi heyf ke a zî çin a. Çend serrî yo ke aqûbetê bi hezaran domananê nê şarî hema zî dîyar nîyo. Ma wazenî ke aştîyêka domdare û bi rûmet bêra nê welatî û heme şaranê Rojhelatê Mîyanênî bigîro binê sîwanê xo. Ma hema zî vera şîdetî yê, labelê kurdî bi şîdet û kiştişî nêqedîyenê. Bi kiştiş zî çareserî nêbena. Serek û na rêxistine kurdî dardekerdişî ra ardê sereyê masaya muzakereyî. No çîyêko qij û şenik nîyo. Eke heta ewro ameyo, bi keda xeylê kesan ameyo ke bedêl dayo.”
‘Ma wazenî sey heme şaranê dinya biciwîyê’
Adîl Kiliçî vat ke ê zî wazenê sey heme şaranê dinya bi nasnameyê xo biciwîyê û dîyar kerd ke Komara Tirkîya hema zî komelê kurdî înkar kena û wina domna: “Verê cû paradîgmaya înan çi bîye ewro çi ya, ganî ma nê çî ser o bîfikirîyê. Êdî zaf cayanê dinya de tayê dewletî pîya rayra şonê. Şarê kurd û tirk bi hezar serran o ke pîya ciwîyenê. Verî ke Komara Tirkîya bêra awankerdiş, ma û tirkan no welat îşxalî ra xelasna. No hal de zî Komar xo serê înkarkerdişê ma awan kerd û hema zî ma înkar kena. Ma çîyêko pîl nêwazenî, ma tena estbîyayîşê xo wazenî. Ma wazenî sey heme şaranê dinya biciwîyê û ma bizanê ke ma zî kurd ê. Kurdîstan de çend serewedaritişî ke ameyê kerdene, heme zî semedê nasnêkerdişê ma bîyê. Hema zî seba estbîyayîşê ma benê. Seba ke nê çîyî reyna nêbê, çekî ameyî veşnayîş.”
‘Ganî qanûnî birêz Ocalanî reyde bêrê viraştiş’
Adîl Kiliçî dîyar kerd ke ganî îqtîdar derheqê prosesê ewroyî de bilez qanûnan virazo û wina vat: “Ganî Rayberê nê şarî esas bigîrê, ey reyde muzakereyan bikerê. Nêbeno ke bi hawayêko yewhetî bo, ganî dihetî bo. Merdim nêşeno hewzêka veng de asnawe bikero, ganî a hewze pirr ba. Ewro bi mîlyonan kesî ey sey Rayberê xo vînenê û sey mûxatab vejenê vernî. Muxatabê na dewa zî tena o yo. Ganî qanûnî bi hawayêko yewhetî nê, ganî birêz Ocalanî reyde bêrê viraştiş.”
‘Têgêrayîşê Azadîya Kurdî çi kewto milê ey ser o, kerd’
Dewamê qiseykerdişê xo de Adîl Kiliçî dîyar kerd ke wexto ke proses dest pêkerd û çekî ameyî veşnayîş, pawitişê komelî zaf pîl bîyê û wina vat: “Destpêkê prosesî de, wexto ke serekîî veng da embazan û vat, wa PKK çekanê xo biveşno; rêxistine kongre organîze kerd, xo fesih kerd û çekê xo veşnayî. Dima ra zî xeylê gamê bînî eştî û hêzê xo zî peyser antî. Seba ke no proses aver şêro, Têgêrayîşê Azadîya Kurdî çi kewto milê ey ser o, kerd. Labelê çi heyf ke yew serre yo hetê dewlete ra çîyêk nêaseno. Tena komîsyonek awan kerd û çend heb parlamenterî reseyê pê, şonê û yenê. Çîyêko zelal çin o, her ke şono hêvîya komelî şikîyena. Wexto ke proses dest pêkerd û çekî ameyî veşnayîş, pawitişê komelî zaf pîl bîyê.”
‘Kes şer nêwazeno, her kes aştî wazeno’
Peynîya qiseykerdişê xo de Adîl Kiliçî vat ke ganî dewlete aştî tena bi yew terefî rayra nêbera û wina qedêna: “Tena şarê kurdî nê, pawitişê şaranê bînan zî zaf est ê. Kes şer nêwazeno, her kes aştî wazeno. Welatêkî de ke aştî, aramî û têduştî bibê do uca de nan, awe, aktîvîteyê komelkî û cuyêka zaf weşe bibê. Welatêkî de ke şer bo, uca de kiştiş, talan, zindan û vêşanîye zî est ê. Aştî bi yew terefî nêbena û qanûnî nêvirazîyenê. Ganî no sîstem derheqê prosesî de bawerîyêk bido na grûbe. Beno ke no proses biherimîyo, gelo komel ci rê çend hazir o? Seba ke aştî biba, ganî qadê sîyasî zî xo bihêz bikero, hîra bikero û zanayîşanê zelalan komelî reyde pare bikp. Ma wazenî aştîyêka domdare û birûmet bêra nê welatî. Lazimtîya nê komelî zaf bi aştî û aramîye est a. Ma wazenî sey şaranê heme dinya bibê wayîrê nasname, kultur, ziwan û bibê wayîrê heme heqanê xo yê bingeyênan.”
