Fîlozofo amerîkayij Mîchael Hardtî mektuba xo ya seba Rayberê Şarê Kurdî Abdullah Ocalanî de bale ante şer û hêrişanê emperyalîstan ser o ke zêdîyenê û vat: “Seba ke goreyê şertanê ewroyî bibo, ganî ma enternasyonalîzmî newera bifikrîyê û newe ra awan bikerê.”
Fîlozofo amerîkayij Mîchael Hardt ke ronayoxanê sosyalîzmê seserra 21. ra yo, mektuba xo yake seba Rayberê Şarê Kurdî Abdullah Ocalanî Heyetê Îmralîyî rê erşawit, tede tekîd kerd ke merkezê giranîya projeyê enternasyonalîstî ganî têkoşînê azadîye yê ewroyî bibê.
Mîchael Hardtî mektuba xo de vat ke ewro ke şer, jenosîd û hêrişê emperyalîstî zêdîyenê, hem teorîk hem pratîk enternasyonalîzm reyna lazim bîyo, la seba ke goreyê şertanê ewroyî bibo, ganî newe ra bêro fikirîyayene û awankerdene. Ey Rayberê Şarê Kurdî Abdullah Ocalanî ra waşt ke fikrê xo derheqê na mesela de pare bikero.
Mîchael Hardtî îfade kerd ke termê ke ey şuxulnayo beno ke raşt nêbo, çunke enternasyonalîzmo ke o qesd keno tena tifaqanê mîyanê netewe-dewletan ser o ronaye nîyo. Ey da zanayene ke serranê 1970î de rayberê Partîya Panteranê Sîyayan Huey Newtonî herinda ci de konseptê “înterkomunalîzmî” pêşkêş kerd û ey no cehd erjnayo. Goreyê Mîchael Hardtî ewro enternasyonalîzm ganî projeyêko zafhetî bo; tayê dewletê averşîyayeyî û îttîfaqê herêmkî beno ke rolêko sînordar bigîrê, la merkezê giranî ganî têkoşînê azadîye yê ewroyî bibê. Ey tekîd kerd ke ewro nê têkoşînî binê zordarîya şîdetî û dorpêçê îdeolojîkî de bi zehmetîyêka girse têkoşîn kenê.
Mîchael Hardtî peynî de vat ke hema zaf çî est o ke bêro vatene, la ey no munaqeşeya hîraye tîya de verdaye.
Mîchael Hardt kam o?
Mîchael Hardt ke 17ê tebaxa 1960î de ameyo dinya, fîlozof û teorîsyenêko sîyasî yo amerîkayij o. Bi taybetî xebatanê xo yê derheqê antropolojî, felsefeya sîyasî û kapîtalîzmê globalî de yeno naskerdene. Bi Antonîo Negrî reyde eserê sey Empîre, Multîtude û Commonwealthî nuştî ke tede têkilîyê îqtîdarî yê globalî, tewirê xoverdayîşî û îmkanê çalakîya kolektîfe analîz kerdî; konseptê kapîtalîzm, demokrasî û wayîrîya hemparî bi perspektîfêko radîkal erjnayî. Xebatanê Mîchael Hardtî warê teorîyê sîyasî û teorîyê rexneyî de tesîrêko mîyanneteweyî yo muhîm viraşt.
