Êlih – Welatij Mûsa Tan, çend rojan ra ver vernîya keyeyê xo de hetê kes yan zî kesanê ke nasnameyê înan dîyar nîyo bi çek ame kiştene. Kênaya ey Fatma Tan ard ziwan ke ê do bikewê pey na hedîse û dîyar kerd ke ganî rayedarî hedîse ser o vinderê û hedîse zelal bikerê.
Mûsa Tan o 70 serre yo ke Êlih de ciwîyayêne, 7ê tirmehe de badê nêmrojî keyeyê xo yê Taxa Hîlalî ya Êlihî ra vejîyeno teber, kuçe de hetê kes yan zî kesanê ke nasnameyê înan dîyar nîyo, rastê hêrişêke çekdarî amebi û bi giranî birîndar bibi. Musa Tan hewanabi Nêweşxaneyê Perwerde û Cigêrayîşî yê Êlihî û tewlê heme mudaxaleyan zî cuya xo ra bibi. Cenazaya Mûsa Tanî Goristanê Girbereşk de ame definkerdene. Tezîyeya ke seba Mûsa Tanî vizêrî Taxa Beşevler de ameya ronayene do siba biqedîya. Cigêrayîşo ke derheqê hedîse de hetê Serdozgerîya Komare ya Êlihî ra ameyo dest pêkerdene dewam keno. Kênaya Mûsa Tanî, Fatma Tan derheqê kiştişê pîyê xo de ajansê ma rê qisey kerd.
‘Pîyê mi vat ‘mi kesî nêdîyo’
Fatma Tan ard ziwan verê ke hedîse bêro sereyê pîyê aye, ê heme sey keye vernîya banê xo de ronişte bîyê û wina qisey kerd: “Pîyê mi nimajê xo yê nêmrojî kerd û badê vejîya teber. Seba ke saeta ey a vejîyayîşê teberî dîyar bîye, her tim saete di de vejîyayêne teber. Badê ke keye ra vejîya panc deqîqeyî nêkewt mabên, di gedeyê taxe ameyê verê berî û birayê mi ra vat, ‘Tay kesan hêrişê pîyê şima kerdo û pîyê şima kewto erd.’
Heta ma şîyê cayê hedîse, cîrananê ma ey berdbi nêweşxane. Ma zî dimayê înan şîyê û ma resayê ci. Wexto ke ma şîyê nêweşxane tay ekîbê polîsan uca de bîyê û tira persayê, ey zî vat; ‘mi kesî nêdîyo.’ Dima ma zî tira pers kerd, ma ra zî vat ‘mi kesî nêdîyo.’ Badê ke emelîyat derbas kerd, ez û birayê xo ma şî verê ey, heta o wext zî hişê ey sereyê ey de bi. Kuçe de kesêk çin bi. Xora nê saetan de germ ra taxe bêvenge bî. Heta nika ma nêeşnawito ke pîyê mi û kesêkî reyde pirodayo û ma wayîrê neyarî zî nîyê.”
‘Heta dewlete zelal nêkera ma do nêvinderê’
Fatma Tan waşt ke ganî bilez edalet bêra caardene û wina vat: “Ma wazenê xo teslîmê edaletî bikerê. Seba ke barê ma giran o û dejê ma zî zaf o, ma wazenê demêko nêzdî de na hedîse zelal biba. Vanê her roje ekîbî taxe de yê, la ma zî bi şînê xo meşgul ê. Eke ekîbî tîya yê ganî hêrişî zî vejê meydan. Ma vanê ke şikê ma kesî ra bibo, o zî çin o. Ewro şînê ma ronayeyo la meşte ma do dest cigêrayîşê edaletî bikerê. Eke rastîye nêvejîya orte, o wext am do çîyêko bîn bifikirîyê. La bi hawayêk yeno vatene ke mesafeyo ke gule ginayê zaf dûrî bîyo. Tena mabên de qandê des metreyan mesafe bibi. Seba ke mesafe hende tay bîyo guleyê ke ginayê piro zî vejîyayê teber. Ma do na dewa ra fek vera nêdê. Pîyê mi kesêko wina qij nêbi. O pîyê erjan bi. Heskerdişê ey zerrîya zafê kesan de bîbî, naye ra ma do zî heta peynî dimayê na hedîse de bibê. Kamî kerdo, heta dewlete zelal nêkera ma do nêvinderê.”
