Keyeyê gerîla Zeynep Oz (Bêrîtan Botan) ke serrêk ra ver tewrê merasimê îmhakerdişê çekan bîbî, dîyar kerd ke gedeyanê înan her çî kerd û ganî êdî dewlete çîyêko keweno serê milê aye bikera û vat ke eke aştîyêk yena awankerdene ganî Rayberê Şarê Kurdî Abdullah Ocalan azad bibo.
Badê vengdayîşê Aştî û Komelê Demokratîk ê Rayberê Şarê Kurdî Abdullah Ocalanî, Têgêrayîşê Azadîye seba proseso ke Abdullah Ocalan dabi dest pêkerdene, aver şêro xeylê gamê muhîmî eştî. Nê gaman ra yew zî veşnayîşê çekan bîye. 11 temmuza 2025î de bi tewrbîyayîşê Hemsereka Rayberîya Konseya KCK’yî Besê Hozat, Endamê Komîteya Merkezî ya PKK’yî Nedîm Seven û 28 gerîlayanê PKK’yî vernîya Eşkefta Casene de bi nameyê Grûba Aştî û Komelê Demokratîk çekê xo veşnayî.
Bi na game Têgêrayîşê Azadîye girêdayîya xo ya bi vengdayîşê Abdullah Ocalanî bi hawayêko şênber da mojnayene. A roje ra heta ewro serrêke derbas bîye û rixmê hende gamanê şênber ê Têgêrayîşê Azadîye zî heta nika hetê dewleta Tirkîya ra tu gamêka şênbere nêameya eştene.
Wexto ke 11ê temmuza 2026î de keyeyanê gerîlayan dî ke gedeyê înan seba averşîyayîşê prosesê Aştî û Komelê Demokratîkî gamê hende muhîmî eştê, ê pê keyfweş bîyê û xeylê keyeyan dîyar kerd ke ê seba aştîyêka bi rûmete pey qerarê Têgêrayîşê Azadîye û gedeyanê xo de yê.
Nê keyeyan ra ke kênaya înan çekê xo veşna, keyeyê endama Têgêrayîşê Azadîye Zeynep Oz (Bêrîtan Botan) a. Sey xeylê keyeyan, keyeyê Zeynep Oz a ke qezaya Cizîre de ciwîyena, badê serranê dergan reya yewine kênaya xo dîbî û pê sereberz bîbî. May û pîyê Zeynep Oz zî seba nêeştişê gaman ê dewlete reaksîyon mojna.
‘PKK’yî gamî eştî nika dora dewlete ya’
Elîf Oz da zanayene ke kênaya aye seba aştî çekê xo veşna û wina vat: “Gamêka ameya eştene ser ra serrêk derbas bîye. La heta nika dewleta Tirkîya gamêk nêeşta. Înan gamî eştî la ma hetê dewlete ra çîyêk nêvînenê. PKK’yî gamê xo eştê û paweyê dewlete yê. Ganî êdî dewlete çîyo ke keweno serê milê aye bikero.”
‘Gedeyê ma wazenê mîyanê şarê xo de sîyaseto demokratîk bikerê’
Elîf Oz dîyar kerd ke ê wazenê Rayberê Şarê Kurdî Abdullah Ocalan azad bibo û nê çîyî vatî: “Ma wazenê dewlete game bierza û gedeyê ma bêrê sîyaseto demokratîk bikerê. Wa berê zindanan bêrê akerdene. Eke aştî est a wa serekê ma bêro veradayene. Ma zî gedeyê ma zî paweyê ke dewlete gamanê huqûqîyan bierza.”
‘Ganî dewlete erey nêmana û game bierza’
Pîyê Zeyneb Oz, Îbrahîm Ozî zî da zanayene ke gama ke serrêk ra ver ameya eştene gamêka ver bi aştî bîye û wina vat: “Înan seba aştî gamêk eşt. Ma pawitêne ke ganî dewlete zî cewabêk bidayêne na game. Serrêk derbas bîye la ma çîyêk nêdî. Ê kesê ke çekî veşnayê wazenê bêrê mîyanê şarê xo û sîyaset bikerê. Ganî dewlete erey nêmana û gaman bierza.”
