Goreyê daneyanê şîdetî yê ajansê JINNEWS’î, aşma hezîrane de 29 cinî ameyî kiştiş, 14 cinî û 2 gedeyî zî biguman dinyaya xo bedilnaya.
Şaristananê Kurdîstan û Tirkîya de, şîdetê camêrdan her roje hîna vêş beno. Hema hema her roje cinîyêk yena kiştiş û hedîseyê şîdetî yê ke nêkewenê qeydan zî nezelalîya xo pawenê. Goreyê daneyanê ke ajansê JINNEWS’î xeberanê çapemenî ra antê pêser, aşma hezîrane de 29 cinî ameyî kiştiş, 14 cinî û 2 gedeyî zî bi hawayêko biguman dinyaya xo bedilnaya.
Kiştoxî tewr zaf merdimê nêzdîyê înan ê
3 cinîyî hetê camêrdan ra ke astê cîyabîyayîşî de bîyê, 2 cinîyî hetê lajanê xo ra, 9 cinîyî hetê mêrdeyanê xo yê zewijîyayan ra, cinîyêk hetê ciranê xo ra, cinîyêk hetê birayê xo ra, cinîyêk hetê mêrdeyî ra ke verê cû embazê ci bi, 3 cinîyî hetê camêrdan ra ke nasnameyê înan nêameyo eşkerakerdene, 2 cinîyî hetê camêrdan ra ke tira aqitîyayê, 2 cinîyî hetê merdimanê xo ra, cinîyêk hetê nasê xo ra, cinîyêk hetê camêrdî ra ke waştêne ci ra cîya bo, cinîyêk hetê waşteyê xo ra û 2 cinîyî zî hetê pîyê xo ra ameyî kiştiş.
Goreyê şaristanan
Xarpêt de 1, Bursa de 3, Konya de 2, Riha de 2, Denizli de 1, Gumuşhane de 1, Mugla de 1, Aydin de 1, Îzmîr de 1, Manîsa de 2, Colemêrg de 3, Antalya de 1, Mardîn de 1, Meletî de 3, Stenbol de 1, Hatay de 1, Anqara de 1, Ordu de 1, Erzîngan de 1, Dîlok de cinîyêk ameye kiştiş.
