Amed- Problemê ke şarê Oglakli ciwîyenê, her roje bineyna zêde benî. TOKÎyanê Oglakli de problemê binawanî û problemê welatîyanê ke TOKÎ de ciwîyenê, roje bi roje vêş benê û kes ci rê yew çare nêvîneno. Hemwelatîyê ke TOKÎyanê Oglakli de ciwîyênê, seba nê probleman wazenê ke yew çareserî bêra vînayene û no semed ra veng danî dezgehanê şaristanî.
Erdlerzo ke 6ê sibata 2023î de merkezê ci qezaya Mereşî Bazarcixî bi tesîrê zaf şariştanan kerd. Nê şaristanan ra yew zî Amed bi û zaf banan zerar dî, 902 kesan zî cuya xo kerd vîndî. Serê nê erdlerzî ra 3 serrî vîyartî û birînê nê erdlerzî hîna zî dewam kenê. Dewlete binê nameyê TOKÎ de tayê cayan de banî viraştî la problemê nê banan roje bi roje benê zêde. Oglakli ya ke girêdayeyê qezaya Rêzan a Amedî ya, uca de zî zêdeyê 16 hezarî banî amebî viraştene. La problemê biawanî, resayîş û qadanê komelî nêqedîyenî. Nê problemî cuya roniştoxanê TOKÎ’yî ser o tesîrêko xirab kenê û cuya înan a rojane rastê astengîyanê pîlan yena û vanî ke ê yenî mexdurkerdene.
‘Ma tîya de tena verdayî’
Ronîştoxanê TOKÎyanê Oglakli ra Memduha Ayatayî da zanayene ke problemê înan zaf ê, gazincê xo wina ardî ziwan û vat: “Tîya de ne bazar est o, ne nêweşxane, ne zî problemê rîngan çareser benê. Şaredare problemanê ma çareser nêkena. Her çî kem o. Wexto ke ma kerdîme nê banan, ma ra vat, ‘her çî amade yo.’ Çîyêk zî amede nîyo. Ma tîya de tena verdayî. Ma saetêk, saet û nîm pawenî ke rîngî bêrê. Ma wazenî nêweşxane, banê weşîye û dikanî bêrî viraştiş. Seba bazar, dermanxane, nêweşxane û her çî ma şinê merkez.”
‘Bi seyan kesî wenîşenê yew otobuse’
Welatij Ahmet Ozerî ke o zî TOKÎyanê Oglakli de ciwîyeno, goreyê ey problemê înan nêyenê vînayene û wina vano: “Ma zaf rezîl bîyî, ma qet memnun nîyî. Problemê resayîşî, problemê rayberîya TOKÎyan, çinbîyayişê awe û paknêkerdişê dormeyan est ê. Însanî tîya de rezîl benî. Wa şaredarî yan zî Wezaretê Dormeyî ma rê çareyêk bivînî. Kîlît dayî ma, labelê 5-6 aşmî yo ke ma zereyê rezîlîye de yî. Ez veng dana Erdoganî, wa çareyêk bivîno. Ê pereyan û aîdatan wazenî, la orte de çîyêk çin o. Wa rayberîya TOKÎ’yî dest bi karê xo bikera. Yew otobuse yena, se kesî wenîşenê. No nêbeno. Ma wazenî ke otobusê ke yenê şinê mabênê înan de tena 10-15 deqeyî bibê.”
’13 beşî est ê la tena yew bazar est o’
Sedat Pamukî zî bale ante problemanê dormeyî ser o û wina vat: “Viraştişê binawanîyê dormeyî çin o. Problemê resayîşî, nêweşxane û bi taybetî zî yê bazarî est ê. Rewşêka normale de ganî hewte de 3 reyî bazar bêro ronayene, la tîya de 13 beşan rê tena yew pazar est o. O zî zaf dûrî yo. Ma wazenê ke viraştişê dormeyî bibê û nêweşxane bêro akerdene. Ganî şaredarî daranê tîyayî awe bida, la awe çin a. Ma zereyê zehmetîyêka pîle de yî.”
‘Darî bîyî ziwa, awe çin a’
Îrfan Teyfur zî semedê çinbîyayîşê awe dîyar kerd ke darê ke uca de ameyî ronayene pêro bîyî ziwa û wina vat: “Tîya de problemî zaf ê. Ne darî yenî awdayene, ne pakîye est a, ne zî resayîş. Darî pêro bîyî ziwa. Awe çin a, rojî est ê ke qet awe nêyena. Pakîye çin a. Şew beno roj beno însanî mîyanê sefîlîye de wenîşenê otobusan. Ma wazenî otobusê qijî, dolmîşî zî bêrî, darî bêrî awdayene û dorme bêro rastkerdene.”
Hemwelatîyê TOKÎyanê Oglaklî veng danî rayedaranê Şaredarîya Amedî ya Şaristanê Girdî û Wezaretê Dormeyî ke vengê înan bêro eşnawitiş û nê problemanê bingeyênan demêko kilm de çareser bikerî.
