Şubeyê Komeleya Pîr Sultan Abdalî (PSAKD) ê Semsûrî bi semedê aşma Muharemî aktîvîteyêka (germîya îmaman) aşûre viraşte. Aktîvîte de Hemsereka Pêroyî ya Partîya Herêmanê Demokratîkan (DBP) Çîgdem Kiliçgun Uçar, rêxistinê şaristan û qezayan ê DEM Partî, temsîlkarê rêxistinan ê demokratîk û partîyanê sîyasîyan pîya bi zaf hemwelatijî tewr bî.
Hemserekê Şubeyê PSAKD ê Semsûrî Elî Sekmanî qiseykerdişê akerdişî yê çalakîye de wina va: “Kerbela tenê serebûtêko ke tîfê tarîxî de mendo nîyo. Ewro kamca de neheqîye esta, kamca de cîyayîye esta, kamca de heqê merdiman rûyê nasname, bawerî û fîkranê înan ra yenê obînkerdene, Kerbela ey cayî de ya. Verê Hazretî Husênî zî her vaxt hetê mazlum, emektar û heqdarî de yo. Ma hemwelatîyê têduşt ê nê welatî yê, bawerîya ma qedîm a û nê erdan a. Ma lutfê kesî nêwazenê, ma heqanê xo yê qanûnî û merdimatî wazenê. Çike ma nêwazenê rûyê bawerîya xo ra tewrê cîyawazîye bîbê; ma waştena xo ya Tirkîyaya demokratîke ewro zî pîya anîme ziwan. Vatena Pîr Sultanî rayîre nîşanê ma dana: Canêne bêrê ma bîbê yew.”
‘Ma do vindetişê xo yê Husênî ra peyser nêagêrê’
Hemsereka Pêroyî ya DBP’ye Çîgdem Kiliçgun Uçare zî aktîvîteye de qisey kerd û waşt ke roje û şîn o ke na aşma Muharemî de ameyê guretene, qebûl bê.
Çîgdem Kiliçgun Uçare dîyar kerd ke qirkerdişê ke 1346 serrî verê ci Kerbela de ameyo kerdene, tenê Hazretî Husên û embazanê ey ê rayîrî nê, heme merdimatîye kerde binê tesîrê xo. Uçare seba nê çîyî vatena Aşiq Vîranî arde vîr: “Şah Husên şahîdê mazluman o, axê merdimatîya binê nê çolî yo.”
Hemsereka Pêroyî ya DBP’ye Çîgdem Kiliçgun Uçare va ke no xoverdayiş ewro zî îtîqatê Elewîyan de, ceman û semahanê înan de, bi vengdayîşê paştdayîş û yewbîyayîşî de weşîya xo dewam keno.
Çîgdem Kiliçgun Uçare ard vîrî ke Gazî, Meraş û Çorum de qirkerdişî û qebûlnêkerdişê îtîqatî kewtê para Elewîyan; labelê bi vatena Pîr Sultan Abdalî ya “kam ke agêreno wa bîagêro, ez rayîrê xo ra nêagêrena,”rayîrê ke peyser nêagêrîyeno rayîrê heq û raştîye yo, rayîrê 72 mîletan rê bi yew çimî ewnîyayîşî yo.
Dima qiseykerdişan ra derbazê barekerdişê loqmeyan bî.
Gûlbangê loqmeyî hetê Pîr Erdal Bozkurt o ke Ocaxa Kureyşan ra yo, ame dayene û dima zî aşûre ameyê vilakerdene.
Elî Sizer û zakîran pîya dêyîrî vatî û hetê ra zî semaye amê geyrayene.
