Amed – Amed de 27-28ê hezîrane de do konferansê ziwanê Kurdkî bêro viraştiş. Derheqê konferansî de, rayberanê konferansî ra avûkat Mehmet Emîn Gokdemîrî wina vat: “Kurdî do bêrê têhet, seba ziwanê Kurdkî, statu û perwerdeyê bi ziwanê Kurdkî qalî bikerî û peynîya nê konferansî de zî do netîceyêka xurt vejîya.”
Amed de 27-28ê hezîrane de konferansê ziwanê Kurdkî bêro viraştiş. Konferans do bi sloganê, “Statu ra heta perwerdeyî seba muzakereyî çarçewayêka newa” ÇandAmed de salona pîle de bêro viraştiş. Konferans do 7 beşan û roniştişê encamî ra bêro viraştiş: Beşê huqûq, perwerde, kultur û rojnamegerî, sîyaset û rayberîyê herêmî, domdarî û stratejî, beşdarîya pisporan û delegeyan.
Derheqê konferansî de, rayabenê konferansî ra avûkat Mehmet Emîn Gokdemîrî ajansê ma rê qisey kerd.
‘Amancê konferansî tespîtkerdişê probleman o’
Mehmet Emîn Gokdemîrî dîyar kerd ke do konferansî de babetê sey, statu ra heta perwerdeyî, prosesê aştî de ziwanê Kurdkî bêrê qiseykerdene û wina domna: “Nika seke yeno zanayîş prosesêkê aştî est o, hema zî devam keno. No presesê aştî dê yew het de Birêz Ocalan, heto bîn de dewlete est a. Nê prosesî de TBMM de komxebatêk ameye viraştiş. Her kes şi uca de qal kerd. Çi kêmî yo, ganî çi bêro kerdiş, ameyi tespîtkerdiş. Uca de heqê ziwanî ser o, heqê pêro şarê kurdî ser o tay tespîtî ameyê kerdiş. Înan ra yew zî heqê xozayî bi. Heqê xozayî mîyan de hetê huqûqî de ma haqanê pozîtîf, haqanê negatîf û heqê statuyî ser o eşkenî qal bikerî. Uca de zî heqê ziwanê Kurdkî est o. Heqê ziwanê Kurdkî nêameyo dayiş. Tespîtê meclîsî no yo ke ganî no heq zî bero dayîş. No konferans zî amanc keno ke nê heqê dayîşê heqê ziwanê Kurdkî yê kurdan de her kes eşkeno se bikero? Meclîs ganî kamcîn qedexeyan wedarno û ganî çi bêro kerdiş, înan verî tespît bikero dima qalî bikero, tewr peynî zî, rayîr bimojno, şîret û tewsîye bido. Vajo ke ganî nê çîyî bibedilîyê.”
‘Konferans do 7 beşan û roniştişê encamî ra bêro pê’
Mehmet Emîn Gokdemîrî vat ke wexto ke merdim vano statu û perwerde, tena yew perspektîf bes nîyo û ganî hîra bêro girewteiş. Goreyê agahîyan Mehmet Emîn Gokdemîrî programê konferansî bi no hawa yo:
1- Huqûq: Çi qedexeyî ziwanê ser o est ê, do serê înan de bêro qiseykerdene.
2- Perwerde: Model û rayîrê perwerdeyê ziwanî,
3-Kultur û Rojnamegerî: Beş bi beş do bêrê erjnayene,
4- Sîyaset û Rayberîyê Herêmî: Rolê sîyaset û rayberîyê herêmî yê ziwanê ser o,
5- Domdarî û Stratejî: Siba û gandarmendişê ziwanê Kurdkî,
- Beşdarîya Pisporan: qiseykerdişê kesanê zana û pispor
7- Beşdariya Delegeyan: Delegeyî do goşdarî bikerî, persanê xo pers bikerî û pîya yew rayîr bivînî,
Dimayê munaqeşayanê her 7 beşan, roniştişo peyên de pêşnîyaz û plansazîya pratîkî seba qerardayîşî, vernî ra heta peynî do bêrê viraştiş.
‘Her ca ra delegeyî do bêrê Amed’
Mehmet Emîn Gokdemîrî dîyar kerd ke no konferans tena yew beş ser o nîyo, beşanê huqûq, psîkolojî û sosyolojî pêro pîya zereyê xo de hewêneno. Mehmet Emîn Gokdemîrî dîyar kerd ke pêro pisporê ziwanî ke her lehçe ser o xebitîyenê, sazgehî, komeleyî û weqfî ameyî dawetkerdene û vat: “Teberê welatî ra, şaristananê bînan ra û her ca ra delegeyî yenî. Amed bi xo ra zî do zaf delegeyî bibê. Sazgeh û dezgehê ke yenî tîya, wazenê ke mîyanê xebatanê xo de plansazîyêk bikerê û nê planan berî komele û weqfanê xo de şîrove bikerî û mîyanê xo de qerar bigîrî.”
‘Do seba prosesê aştî bibo wesîleyê feydeyî’
Avûkat Mehmet Emîn Gokdemîrî peynîya qiskerdişê xo de seba konferansî hêvîya xo îfade kerd û vat: “Ez hêvî kena no konferans ma rê zî do bibo wesîleyêk. Hem semedê prosesê aştî hem zî seba çîyanê bînan, ez hêvî kena do zaf bifeyde bibo. Tewr peynî ez eşkena ne çîyî vaja, seke yeno zanayîş ma vat xora meclîs de yew prosesê aştî dewam keno û na aştî de zî behsê ziwanê Kurdkî yeno kerdene. Kurdî bêrê têhet seba ziwanê Kurdkî, statu û perwerdeyê bi ziwanê Kurdkî qalî bikerê û peynîya nê konferansî zî de zî do netîceyêka xurt vejîya.”
