Sosyologe Laura Corradi, bi cigêrayîşê xo yê ke jineolojî bi rexneyê zanistê femînîstî pîya girewt xo dest, Konferansê 12. yê Cigêrayîşanê Cinîyan ê Dinya de bi xelata “Pêşkêşîya Berze” ame layiqdîyene.
Sosyologe Laura Corradi ke Tayland de mîyanê tarîxanê 26-30ê gulane 2026î de beşdarê Konferansê 12. yê Cigêrayîşanê Cinîyan ê Dinya de bîye, bi pêşkêşîya fekkî yê cigêrayîşê xo yê bi sernuşteyê “Rexneyê Zanistê Femînîstî yê Sandra Hardingî ra heta awankerdişê jineolojî,” xelata “Pêşkêşîya Berze” girewt.
Sosyolojîya bedenî û xebatê cinsîyetê komelkî
Laura Corradi ke akademîsyene û aktîvîstêk a ke warê sosyolojîya bedenî de xebitîyena, doktoraya xo Beşê Sosyolojî yê Zanîngehê Kalîfornîya de temam kerd. Corradi heta ewro bi seyan meqaleyê akademîk û populer û nêzdîyê 15 kitabî nuştî.
Corradi ke Zanîngehê Calabria de dersa Cinîsyetê Komelkî û Zanist, Xebatê Zayenda Komelkî û Metodolojîya Têkewtene dana, xebatanê Laboratuwarê Femînîst Queer ê Dekolonyaî yê eynî zanîngehî zî koordîne kena.
Jineolojî hetê xebatanê cinîyan ê global ra gêna dest
Corradi bi rayîrê xebatanê xo yê akademîk û tecrubeyanê xo yê têkoşînê femînîstî, dest pêkerd ke bi fikrê Rayber Apoyî eleqedar bibo. Corradi ke vat vatişê jineolojî û tecrubeyê pratîkî yê şoreşê cinîyan ê kurdan, hetê averberdişê xebatê cinsîyetê komelkî yê globalî ra muhîm ê, cigêrayîşanê xo de jineolojî ser o gêrayîş keno.
Xebatê Corradi, paradîgmaya modernîteyê demokratîkî û metodanê na paradîgma zî gênê xo mîyan. Corradi demêko derg o têgêrayîşê cinîyan ê kurdan reyde mîyanê paştîye de ya û bi nêzdîyayîşêko enternasyonalîst têgêrayîşî reyde nêzdî ra hemkarîyêk ramena.
Netîceyê na hemkarîye û xebatanê akademîkan de ke warê jineolojî de ramitî, Corradi Konferansê 12. yê Cigêrayîşanê Cinîyan ê Dinya de bi xelata “Pêşkêşîya Berze” ameye layiqdîyene.
