Platformê Dezgehanê Demokratîkan Meydanê Şêx Seîdî yê Amedî de bi eşkerayîyêke îdam û înfazê sîyasî yê Îranî protesto kerdî û waşt vera îdamî wa herkes vengê xo berz bikero.
Platformê Dezgehanê Demokratîkan Meydanê Şêx Seîdî yê Amedî de bi eşkerayîyêke îdam û înfazê sîyasî yê Îranî protesto kerdî. Çalakîye de pankartê “Şarê kurdî bi îdaman nîno bêvengkerdene, Îdaman rê vaje ney” ame akerdene û sloganê “Jin, Jîyan, Azadî” û “Şehîd namirin” ameyî vatene.
DEM Partî, DBP, xeylê temsîlkarê rêxistinanê komelê demokratîkî û xeylê kesî tewrê çalakîye bîyî. Eşkerayîye kurdkî û tirkî ameye wendene.
Eşkerayîye de ame vîrvistene ke îdareyê Îranî vera şarê kurdî polîtîkayanê zext, înkar û îdamî domneno û wîna ame vatene: “Waştişê heqê demokratîkî bi zextanê giranan yenê astengkerdene. Îran de ciwanê kurdî, sîyasetmedar û aktîvîstî yenê hedefgirewtene. Bi hukmkerdişê bêhuqûqî û qeraranê lezabezan îdamî bi hewayêkê sîstematîkî zêdîyayî. Tarîx mojnayo ke rejîmê vera şarî rew ya zî erey binkewtişî rê mehkum ê.”
Hemsereka DEM Partî ya Amedî Gulşen Ozer zî ard ziwan ke îdamê Îranî huqûqî nîyê û vat, “Nê caardişê sûcê vera merdimîye yê. Gerek rayapêroyî ya dinya vera nê vengê xo berz bikero.”
