Forumê Aştî û Azadîya Komelkî ya ke hetê Şaredarîya Amedî ya Şaristanê Girdî ra yeno viraştiş, roja xo ya dîyin de dewam keno. Roja dîyin de zaf komxebatî ameyî kerdene û “Nawiteghê Aştî û Azadîya Komelkî” ke tede berhemê 32 hunermendan yenê mojnayîş, dewam keno.
Forumê Aştî û Azadîya Komelkî ya ke hetê Şaredarîya Amedî ya Şaristanê Girdî ra yeno viraştiş, roja dîyin de dewam keno. Çarçewaya programî de, qezaya Sûrî de rayîrşîyayîşêk ame viraştene. Reyna bi babetanê cîya-cîyayan cayanê cîya yê şaristanî de komxebatî yenê kerdene. Nawitgeho ke tede 32 hunermendî bi berhemanê xo beşdar bîyê, dewam keno.
Vîr û huner pîya yê
Nawitgehî de berhemê 32 hunermendan ke babetanê sey vîrê komelkî, aştî, azadî, xoza û nasnameyî ameyî amadekerdene, yenê mojnayene. Hunermendan bi teknîkanê cîyayan babetê sey ekolojîyê komelkî, heqê cinîyan û nasname pêşkêş kerdî. Bi taybetî enstalasyona hunermend Funda Coşkun a bi nameyê “Kerrayan ser o ke yewbînan ser o ameyê ronayene” sey nîşaneyêkê awankerdişê cuyêka newa û hempar zaf bale ant xo ser.
Mîyanê berheman de, xebata hunermend Hogir Arî zî zaf bale ant. Hogir Arî berhemê xo de ca da xebatkarê rojnameyê Azadîya Welatî Kadrî Bagduyî ke 14ê teşrîna verêne ya 2014î de wexto ke Adana de rojnameyî vila kerdêne, amebi qetilkerdene. No berhem sey sembolê tedayanê serê çapemenîya Kurdkî û têkoşînê heqîqetî ame qebulkerdene.
Nawitgeh heta 15ê gulane akerde yo
Çarçewaya programê forumî de, ewro saete 19:00î de Salona Mehmet Emin Yalçinkaya ya Çand Amedî de kayê tîyatroyî yê bi nameyê “Jîn” bêro kaykerdene û dima ra zî do terraqe bêra kerdene. Her wina eynî saete de Salona Sînemayî ya Çand Amedî de belgeselê “Kerboran” bêro mojnayene.
