Şaredarîya Payîzava ya Wanî, seba ke aborîya cinîyan xurt bikero û paştî bido citkarîya herême, serayêk akerd. Şaredarî do şitlanê sewzîyan bêpere vila bikera û berhemanê ke nê cayan ra vejîyenê erjan biroşa.
Dimayê weçînayîşanê herêmî yê 2024î, Wan de şaredarîyê DEM Partî seba averberdişê aborîya herême projeyanê muhîman rayra benê. Şaredarîya Payîzava zî çarçewaya nê xebatan de, seba paştîdayîşê cinîyan û berardişê herêmî projeyêko newe da destpêkerdene. Şaredarî seba cinîyan serayêk akerd û na sera de bi toximanê herêmîyan şitlê firingî, îsot û firingîyê çerîyî yenê ronayene. Na sera de sung, çîlege û beşîlayî zî yenê ronayene. Amancê projeyî no yo ke cinî qada aborî de bibê wayîrê heqan û azadîya xo ya aborîye peyda bikerî.
Pawitişê toximanê herêmîyan
Fêkîyê ke na sera de yenê ronayene, do bibê marmelat û sos. Berhemê ke bi nê qeydeyî vejîyenê, do bufeyanê şaredarî de bêrê rotiş û pereyo ke nê berheman ra yeno qezenckerdiş zî do reyna seba paştîdayîşê şarê qezayî bêro xerckerdene. Seba keyeyanê ke baxçeyê înan est ê, ê seba ronayîşê sungan zî yenê teşwîqkerdene. Bi taybetî ambar û axuran de bi temînkerdişê hîjyenî, cinî eşkenê sungan ronê û bi nê qeydeyî aborîya keyeyê xo peyda bikerî.
Şitlê ke toximanê herêmîyan ra ameyê girewtiş, do mîyanê 10 rojan de bêpere welatîyan rê bêrê vilakerdene. Şaredarîya Payîzava bi nê projeyê serayî, hem aborîya cinîyan xurt kena hem zî toximanê herêmîyan ra şitlanê bêpereyan resnena şarî.
