Qada Îstasyonî ya Amed û Qada Kadikoyî ya Stenbolî de bi beşdardîyayîşê des hezaran karker û kedkaran mitînganê 1ê Gulane dest pêkerd.
1ê Gulane, heme dinya de sey Roja Yewîye, Piştgirîye û Têkoşînê Karkeran yena pîrozkerdene. Mitînganê 1ê Gulane Amed û Stenbolî de bi beşdarbîyayîşê des hezaran karker û welatijan dest pêkerd.
Amed
Bi rayberîya KESK, DÎSK, TMMOB, TTB û Platformê Sazgehanê Demokratîank ê Amedî seba 1ê Gulane Roja Karker û Kedkaran a Dinya Qada Îstasyonî ya Amed de mitîngêk organîze kerd. Mitîngî ra ver endam û rayberê sazgehanê karî, sazgehê sîvîlî yê komelî û partîyê sîyasî û bi hezaran kesî Çatrayîrê Semtê Ofîsî yê qezaya Yenîşehîr a Amedî de ameybî têhet, bi rayîrşîyayîşî ver bi qada mitîngî herikîyayî.
Girseyo ke rayîrşîyayîşî de pankartanê ser o “Kesê ke ameyoxê xo bi kede awan kenê ê do ser kewê”, “Çapemenîya azade komelo demokratîk”, “Rayîrê heqîqetî sero bi keda roje ma do kapîtalîzmî birijnî, komelê komunalî awan bikerê”, “Keda ma heqê ma yo” , “Sosyalîzmî de israr merdimîye de israr o”, “Vera kedwerîye cuyêka komunal” nuştêne girewtê û bi sloganê “Biciwîyo 1ê Gulane” û “Biciwîyo xoverdayîşê karkeran” ameyê vatene.
Mintîng bi rêzgirewtişê seba cangorîyanê azad û demokrasî dest pêkerd û bi qiseykerdişan dewam kerd.
Stenbol
Stenbol de zî bi rayberîya KESK, DÎSK, TTB û TMMOBî 1ê Gulane bi sloganê “Seba kede, edalet, aştî û demokrasî bibê yew û bivurnê” Îskeleya Kadikoyî de yeno pîrozkerdene.
Wan
Wan de bi pêşengîya Platformê Kede û Demokrasî bi sloganê “Ma seba kede, edalet, têduştî, aştî û demokrasî qadan de yê” qadê şaristanî de mitîn yeno kerdene. Bi hezaran kesî ke mitîngî ra ver kom bîyê, bi kortejan rayîrşîyayîş organîze kerd. Mitîng bi girewtişê govende dest pêkerd. Yeno zanayene ke Hemsereka Pêroyî ya DEM Partî Tulay Hatîmogullari mitîngî ded qiseykerdiş bikera.
Dêrsim
Dêrsim de zî pîrozkerdişê 1ê Gulane bi coşêko pîl dest pêkerd. Sendîka, rêxistinê komelê sîvîlî, partîyê sîyasî û xeylê kesê Kuçeyê Hunerî de kom bîyê, ver bi Meydanê Seyîd Riza rayîrşîyayîş organîze kerd. Rayîrşîyayîşî de xeylê reyan sloganê “Ma karker ê, heqdar ê, do ser kewê” , “Roj do bêro dewran do bibedilîyo, AKP do hesab bido şarî” û “Biciwîyo 1ê Gulane” ameyê vatene.
Rayîrşîyayîşî ra pey do Meydanê Seyîd Riza de mitîng bêro kerdene.
