Qezaya Hezexa Şirnexî de pêşengîya Têgêrayîşê Cinîyan ê Azadan (TJA) de Newroze ameye pîrozkerdene. Taxa Atakentî de çalakîye virazîyaye û zaf kesî beşdar bîyî.
Cinîyê ke vernîya rêxistina DEM Partî ya qezaya Hezexî de amebî pêser bi meşaleyan ver bi warê pîrozkerdişî şîyî. Rayîrşîyayîşî de posterê Rehşane Demîrel ke serra 1992î de bedenê xo dayo ver adirî, ame girewtene.
Rayîrşîyayîşî de sloganê “Bijî Newroz”, “Bijî Serok Apo”, “Jin, jiyan, azadî” û “Newroza te pîroz be ey Serok Apo” ameye eştene. Gama ke cinîyî resayî warî nîşandayîşê fîşekanê hewayî virazîya.
Cinîyan bi meşaleyan ke girewtibî xo dest, adirê Newroze veşna û deyîra “Rehşanê Rehşan” ameye vatene. Girseyo ke dormeyê adirî ra kom bîybî rey-rey sloganî eştî.
Pîrozkerdişî bi govend û vengdayîşê çalakîya Newroze ke 25ê adare de Hezex de do bibo, temam bî.
