Endamê Komîteya Hemserekîye ya PYD’yî Salih Muslim Şam û Beyrûd de ame yadkerdene. Merasimê yadkerdişî de cuye û kesayetê şorişgirî yê Salih Muslimî ame vîrardene.
Seba sîyasetmedar û Endamê Komîteya Hemserekîya Partîya Yewîya Demokratîke (PYD) Salih Muslim Şam de merasîmêk ame kerdene. Temsîlkarê Rayberîya Xoser a Şamî Ebdulkerîm Omer, sekreterê pêroyî yê Partîya Demokratîk a Kurdî ya Sûrîye (PDKS) Cemal Şêx Baqî û hûmarêka sîyasetmedar û roşnvîr û temsîlkarê sazgehanê komelkî beşdar bîyê. Merasîmî de têkoşînê Salih Muslim û keda ey a seba awankerdişê Sûrîyeyêka demokratîke, azade û edil ame vatene.
Beyrûd de sozê rayraberdişê têkoşînê ey ame dayene
Rêxistina PYD’yî ya Lubnanî zî Beyrûd de merasîmê yadkerdişê Salih Muslim û şehîdanê xoverdayîşê taxanê Şêxmeqsûd û Eşrefîye kerd. Merasîm Merkezê Komela Newroze ya Kulturî û Komelkî bi beşdarîya endamanê PYD, keyeyê şehîdan, temsîlkarê Kongra Star û Kurdanê Lubnanî ciwîyenê, ame kerdene. Merasîmî de temsîlkarê Rayberîya Xoser a Lubnanî Ebdulselam Ehmed behsê têkoşînê şehîdanê PYD’yî kerd û dîyar kerd ke PYD partîya şehîd û têkoşeran a.
‘Destkewteyî encamê têkoşînê Muslim û embazanê ey o’
Ehmed dîyar kerd ke PYD’yî temsîlkarîya beşêko gird ê şarê kurdî xeylê cayan de keno û îşaret kerd ke bedilîyayîşanê qadê sîyasî yê kurdî û dinya de bîyê, berhemê têkoşînê kesanê sey Salih Muslim û hemrayanê ey o. Ebdulselam Ehmed vengdayîşê domnayîşê têkoşînê sîyasî seba dewaya şarê kurdî û taqîbkerdişê rayîrê şehîdan kerd. Sewbîna ard vîr ke Salih Muslimî cuya xo seba pawitişê dewaya kurdî çar hetanê Kurdîstanî abirnaye û sîyasetmedar û dîplomatanê ke fikrê komelê demokratîkî ra bawer bi.
‘Rojanê zehmet de wezîfeyê muhîmî girewtê’
Merasîmî de Berpirsa Meclîsê PYD’yî ya Lubnanî Rêvan Mihemed zî vat ke şehadetê Salih Muslimî vîndîbîyayîşêko gird o û wina vat: “Salih Muslimî heqanê şarê kurdî û Sûrîye pawitêne û awankerdoxanê projeyê Rayberîya Xoser a Vakur û Rojhelatê Sûrîye ra yew bi. Prosesanê zehmet de xeylê reyan zî serekîya partî kerd û rolêko gird averberdişê xebata sîyasî Vakur û Rojhelatê Sûrîye de kay kerd. Şehîd Salih Muslim do tim vîrê ma de bo. Têkoşînê ey do xebata sîyasî û neteweyî de sey modelêk bimano.”
