Rêxistina DEM Partî ya Wanî, bi sloganê ‘Ma Seba Aştî û Komelê Demokratîkî Xo Rêxistin Kenî’ qezaya Rêya Armûşî de kombîyayîşê şarî viraşt. Kombîyayîşî de vengdayîşê pîlkerdişê rêxistinbîyayîşî ame kerdene.
Rêxistina Partîya Têduştî û Demokrasî ya Şaran (DEM Partî) ya Wanî, bi sloganê ‘Ma Seba Aştî û Komelê Demokratîkî Xo Rêxistin Kenî’ yew salona dawete ya qezaya Rêya Armûşî de kombîyayîşê şarî organîze kerd. Salone de pankartêko pîl ke ser o ‘Ma seba aştî û komelê demokratîkî xo rêxistin kenî’ nuştebi, ame akerdene. Temsîlkarê dezgehanê sîvîlan û xeylê welatî beşdarê kombîyayîşî bîyê.
Kombîyayîşê şarî, seba yadkerdişê kesanê ke têkoşînê demokrasî û azadîye de dinyaya xo bedilnaya, bi deqîqeyêk rêzgirewtîşî dest pêkerd.
Dimayê rêzgirewtîşî, Hemserekê DEM Partî yê Rêxistina Şaristanî Veysî Dîlekçî qisey kerd.
Veysî Dîlekçî bal ant serkewtişê qonaxê newe yê prosesê ‘Aştî û Komelê Demokratîkî’ ser o û dîyar kerd ke aştî û awankerdişê komelê demokratîkî bi rêxistinkerdişî mumkin o û wina vat: “Ganî ma tena dormeyê xo nê, her ca rêxistin bikerê. Ma kewtî prosesêko newe, waştişê ma yê seba aştî û komelê demokratîkî, zereyê nê prosesê rêxistinkerdişî de xo pênase keno.”
‘Estbîyayîşê ma bi rêxistinkerdişê ma mumkin o’
Dima ra Hemşaredarê Wanî yê Şaristanê Girdî Neslîhan Şedal û Abdullah Zeydanî qisey kerd. Neslîhan Şedal ard vîr ke manîfesto de nuqtaya tewr ewiline rêxistinkerdiş o û nê çîyî vatî: “Manîfesto de zî destpêkî de vano, ‘Ti çend rêxistinkerde bê, ti hende est ê.’ Seba ke ma estbîyayîşê xo bipawê, ganî ma mîyanê heme sazgehan û mîyanê komelî de xo rêxistin bikerê. Eynê wextî de, nê prosesî de ganî ma bi tarzêko newe xo awan bikerê. No tarzo newe zî mîyanê komelî de, bi pîlkerdişê têkîlîyan û rêxistinkerdişî reyde sey estbîyayîşê ma yê pênase beno. Nê semedî ra, heme sazgehê ma û partîya ma nê prosesî de xo goreyê nê dewrî newera awan kenê û rêxistin kenê.”
‘Seba komelê demokratîkî xorêxistinkerdiş şert o’
Abdullah Zeydanî zî qiseykerdişê xo de bal ant muhîmîya awankerdişê zîhnîyetê komelê demokratîkî yê qonaxo newe de û veng da beşdaran ke her keye û kuçe bikerê qadê rêxistinkerdişî.
Abdullah Zeydanî vat ke seba awankerdişê komelekê demokratîkî, nê prosesê newe de xorêxistinkerdiş û yewîya komelkî şertê tewr bingeyên o.
‘Pêşengê şarê kurdî nêyeno xapênayene’
Tewr peynî Parlamenterê DEM Partî yê Wanî Mahmut Dîndarî qisey kerd û bal ant polîtîkayan ser o ke şarê kurdî ser û rayberanê înan ser o yenê rayra berdene.
Mahmût Dîndarî dîyar kerd ke tu kayî nêreseno amancê xo û wina vat: “Rayberê şarê kurdî naxapîneno û nêyeno xapênayene. Nê semedî ra, vera her babete polîtîkayan, tewr zaf nê demî de lazimtîya ma bi xorêxistinkerdişî est a. Ganî ma her qadî de hêzê xo bikerê yew û xo rêxistin bikerê.”
Kombîyayîş bi pers û cewaban qedîya.
